hangama hai kyun barpa thoDi si jo pi li hai

hañgāmā hai kyuuñ barpā thoḌī sī jo pī lī hai

Daakā to nahīñ maarā chorī to nahīñ kī hai

nā-tajraba-kārī se vā'iz kī ye haiñ bāteñ

is rañg ko kyā jaane pūchho to kabhī pī hai

us mai se nahīñ matlab dil jis se hai begāna

maqsūd hai us mai se dil hī meñ jo khiñchtī hai

ai shauq vahī mai pī ai hosh zarā so jā

mehmān-e-nazar is dam ik barq-e-tajallī hai

vaañ dil meñ ki sadme do yaañ jī meñ ki sab sah lo

un kā bhī 'ajab dil hai merā bhī 'ajab jī hai

har zarra chamaktā hai anvār-e-ilāhī se

har saañs ye kahtī hai ham haiñ to ḳhudā bhī hai

sūraj meñ lage dhabbā fitrat ke karishme haiñ

but ham ko kaheñ kāfir allāh kī marzī hai

tā'līm kā shor aisā tahzīb kā ġhul itnā

barakat jo nahīñ hotī niyyat kī ḳharābī hai

sach kahte haiñ shaiḳh 'akbar' hai tā’at-e-haq lāzim

haañ tark-e-mai-o-shāhid ye un kī buzurgī hai

hangama hai kyun barpa thoDi si jo pi li hai

Daka to nahin mara chori to nahin ki hai

na-tajraba-kari se wa'iz ki ye hain baaten

is rang ko kya jaane puchho to kabhi pi hai

us mai se nahin matlab dil jis se hai begana

maqsud hai us mai se dil hi mein jo khinchti hai

ai shauq wahi mai pi ai hosh zara so ja

mehman-e-nazar is dam ek barq-e-tajalli hai

wan dil mein ki sadme do yan ji mein ki sab sah lo

un ka bhi 'ajab dil hai mera bhi 'ajab ji hai

har zarra chamakta hai anwar-e-ilahi se

har sans ye kahti hai hum hain to KHuda bhi hai

suraj mein lage dhabba fitrat ke karishme hain

but hum ko kahen kafir allāh ki marzi hai

ta'lim ka shor aisa tahzib ka ghul itna

barakat jo nahin hoti niyyat ki KHarabi hai

sach kahte hain shaiKH 'akbar' hai ta’at-e-haq lazim

han tark-e-mai-o-shahid ye un ki buzurgi hai