KHudi ke saz mein hai umr-e-jawedan ka suragh

ḳhudī ke saaz meñ hai umr-e-jāvedāñ kā surāġh

ḳhudī ke soz se raushan haiñ ummatoñ ke charāġh

ye ek baat ki aadam hai sāhib-e-maqsūd

hazār guuna faroġh-o-hazār guuna farāġh

huī na zaaġh meñ paidā buland-parvāzī

ḳharāb kar ga.ī shāhīñ bachche ko sohbat zaaġh

hayā nahīñ hai zamāne kī aañkh meñ baaqī

ḳhudā kare ki javānī tirī rahe be-dāġh

Thahar sakā na kisī ḳhānqāh meñ 'iqbāl'

ki hai zarīf-o-kHush andesha-o-shagufta dimāġh

KHudi ke saz mein hai umr-e-jawedan ka suragh

KHudi ke soz se raushan hain ummaton ke charagh

ye ek baat ki aadam hai sahib-e-maqsud

hazar guna farogh-o-hazar guna faragh

hui na zagh mein paida buland-parwazi

KHarab kar gai shahin bachche ko sohbat zagh

haya nahin hai zamane ki aankh mein baqi

KHuda kare ki jawani teri rahe be-dagh

Thahar saka na kisi KHanqah mein 'iqbaal'

ki hai zarif-o-kHush andesha-o-shagufta dimagh