sach kah pasand kis ki hai ai KHub-ru pasand

sach kah pasand kis kī hai ai ḳhūb-rū pasand

tujh ko adū pasand hai mujh ko hai tu pasand

sab ko tirī pasand hai ai māh-rū pasand

a.alam pasand vo hai kare jis ko tū pasand

ḳhanjar dikhā ke kahte haiñ vo baat baat par

ham ko to is zabān se hai guftugū pasand

aao jo mere qatl ko itnā rahe lihāz

nāvik jigar pasand ho ḳhanjar gulū pasand

rahmat hī rahmat us kī hai kar le agar qubūl

merī namāz use hai na merā vuzū pasand

dekhūñ ki mere yaar ke kyūñ-kar nibāh ho

vo dushman aabrū kā hai maiñ aabrū pasand

zīnat ke vaqt bhī hai jo anjām kā ḳhayāl

miTTī ke itr kī hameñ aatī hai bū pasand

ehsāñ kisī kā kab hai gavārā ba-rañg-e-gul

hai chaak pairahan nahīñ lekin rafū pasand

zāhid nigāh-e-kam se kisī riñd ko na dekh

kyā jaane us karīm ko vo hai ki tū pasand

aa jaa.e jis pe dil hai vahī jaan se aziiz

yāqūb ko hai jāma-e-yousu kī bū pasand

khul kar kaho ki bosa-e-gesū na deñge ham

ye uljhī uljhī ham ko nahīñ guftugū pasand

bulbul nisār gul pe hai parvāna sham.a par

zarre ko mehr ham ko hai vo māh-rū pasand

paidā kiyā hai husn ne daulat kā ḳhāssa

vo kaun hai jahāñ meñ nahīñ jis ko tū pasand

sab āfatoñ se chhūT gayā kar ke tark-e-hirs

kyūñ-kar na ho mujhe dil-e-be-ārzū pasand

din-rāt zikr-e-shair-o-sukHan se hai kaam 'amīr'

bāteñ yahī pasand yahī guftugū pasand

sach kah pasand kis ki hai ai KHub-ru pasand

tujh ko adu pasand hai mujh ko hai tu pasand

sab ko teri pasand hai ai mah-ru pasand

aalam pasand wo hai kare jis ko tu pasand

KHanjar dikha ke kahte hain wo baat baat par

hum ko to is zaban se hai guftugu pasand

aao jo mere qatl ko itna rahe lihaz

nawik jigar pasand ho KHanjar gulu pasand

rahmat hi rahmat us ki hai kar le agar qubul

meri namaz use hai na mera wuzu pasand

dekhun ki mere yar ke kyun-kar nibah ho

wo dushman aabru ka hai main aabru pasand

zinat ke waqt bhi hai jo anjam ka KHayal

miTTi ke itr ki hamein aati hai bu pasand

ehsan kisi ka kab hai gawara ba-rang-e-gul

hai chaak pairahan nahin lekin rafu pasand

zahid nigah-e-kam se kisi rind ko na dekh

kya jaane us karim ko wo hai ki tu pasand

aa jae jis pe dil hai wahi jaan se aziz

yaqub ko hai jama-e-yousu ki bu pasand

khul kar kaho ki bosa-e-gesu na denge hum

ye uljhi uljhi hum ko nahin guftugu pasand

bulbul nisar gul pe hai parwana shama par

zarre ko mehr hum ko hai wo mah-ru pasand

paida kiya hai husn ne daulat ka KHassa

wo kaun hai jahan mein nahin jis ko tu pasand

sab aafaton se chhuT gaya kar ke tark-e-hirs

kyun-kar na ho mujhe dil-e-be-arzu pasand

din-raat zikr-e-shair-o-sukHan se hai kaam 'amir'

baaten yahi pasand yahi guftugu pasand