ishq mein ji se guzarte hain guzarne wale

ishq meñ jī se guzarte haiñ guzarne vaale

maut kī raah nahīñ dekhte marne vaale

bazm-e-mātam meñ kabhī shab hī ko aa jā chhup kar

o mire sog ke parde meñ sañvarne vaale

daaġh dil se ye mire kahtā hai us kā joban

dekh is tarah guzarte haiñ guzarne vaale

āḳhirī vaqt bhī puurā na kiyā va.ada-e-vasl

aap aate hī rahe mar ga.e marne vaale

uThe aur kūcha-e-mahbūb meñ pahuñche 'āshiq

ye musāfir nahīñ rahte haiñ Thaharne vaale

naza.a meñ ham haiñ ġham-e-ishq ye chalātā hai

dekh ġhurbat meñ mujhe chhoḌ na marne vaale

jaan dene ko kahā maiñ ne to hañs kar bole

tum salāmat raho har roz ke marne vaale

teġh-o-ḳhanjar se na jhagḌā sar-o-gardan kā miTā

chal diye moḌ ke muñh faisla karne vaale

āsmāñ par jo sitāre nikal aa.e 'amīr'

yaad aa.e mujhe daaġh apne ubharne vaale

ishq mein ji se guzarte hain guzarne wale

maut ki rah nahin dekhte marne wale

bazm-e-matam mein kabhi shab hi ko aa ja chhup kar

o mere sog ke parde mein sanwarne wale

dagh dil se ye mere kahta hai us ka joban

dekh is tarah guzarte hain guzarne wale

aaKHiri waqt bhi pura na kiya wada-e-wasl

aap aate hi rahe mar gae marne wale

uThe aur kucha-e-mahbub mein pahunche 'ashiq

ye musafir nahin rahte hain Thaharne wale

naza mein hum hain gham-e-ishq ye chalata hai

dekh ghurbat mein mujhe chhoD na marne wale

jaan dene ko kaha main ne to hans kar bole

tum salamat raho har roz ke marne wale

tegh-o-KHanjar se na jhagDa sar-o-gardan ka miTa

chal diye moD ke munh faisla karne wale

aasman par jo sitare nikal aae 'amir'

yaad aae mujhe dagh apne ubharne wale