hum loTte hain wo so rahe hain

ham loTte haiñ vo so rahe haiñ

kyā nāz-o-niyāz ho rahe haiñ

kyā rañg jahāñ meñ ho rahe haiñ

do hañste haiñ chaar ro rahe haiñ

duniyā se alag jo ho rahe haiñ

takiyoñ meñ maze se so rahe haiñ

pahuñchī hai hamārī ab ye hālat

jo hañste the vo bhī ro rahe haiñ

tanhā tah-e-ḳhāk bhī ham ham

hasrat ke saath so rahe haiñ

sote haiñ lahad meñ sone vaale

jo jāgte haiñ vo ro rahe haiñ

arbāb-e-kamāl chal base sab

sau meñ kahīñ ek do rahe haiñ

palkoñ kī jhapak dikhā ke ye but

dil meñ nashtar chubho rahe haiñ

mujh daaġh nasīb kī lahad par

laale kā vo biij bo rahe haiñ

piirī meñ bhī ham hazār afsos

bachpan kī niiñd so rahe haiñ

dāman se ham apne dāġh-e-hastī

āb-e-ḳhanjar se dho rahe haiñ

maiñ jaag rahā huuñ ai shab-e-ġham

par mere nasīb so rahe haiñ

ro.eñge hameñ rulāne vaale

Dūbeñge vo jo Dubo rahe haiñ

ai hashr madīne meñ na kar shor

chup chup sarkār so rahe haiñ

ā.īne pe bhī kaḌī nigāheñ

kis par ye 'itāb ho rahe haiñ

bhārī hai jo motiyoñ kā maalā

aaTh aaTh aañsū vo ro rahe haiñ

dil chhīn ke ho ga.e haiñ ġhāfil

fitne vo jagā ke so rahe haiñ

hai ġhair ke ghar jo un kī dāvat

ham jaan se haath dho rahe haiñ

sad shukr ḳhayāl hai usī kā

ham jis se lipaT ke so rahe haiñ

ho jaa.eñ na ḳhushk daaġh ke phuul

aañsū un ko bhigo rahe haiñ

aa.egī na phir ke 'umr-e-rafta

ham muft meñ jaan kho rahe haiñ

kyā girya-e-be-asar se hāsil

is rone pe ham to ro rahe haiñ

fariyād ki nā-kHudā-e-kashtī

kashtī ko mirī Dubo rahe haiñ

kyuuñ karte haiñ ġham-gusār taklīf

aañsū mire muñh ko dho rahe haiñ

mahfil barḳhāst hai patiñge

ruḳhsat sham’oñ se ho rahe haiñ

hai kuuch kā vaqt āsmāñ par

taare kahīñ naam ko rahe haiñ

un kī bhī numūd hai koī dam

vo bhī na raheñge jo rahe haiñ

duniyā kā ye rañg aur ham ko

kuchh hosh nahīñ hai so rahe haiñ

Thahro dam-e-naza.a do gaḌī aur

do chaar nafs hī to rahe haiñ

phuul un ko pinhā pinhā ke aġhyār

kāñTe mire haq meñ bo rahe haiñ

zaanū pe 'amīr' sar ko rakkhe

pahroñ guzre ki ro rahe haiñ

hum loTte hain wo so rahe hain

kya naz-o-niyaz ho rahe hain

kya rang jahan mein ho rahe hain

do hanste hain chaar ro rahe hain

duniya se alag jo ho rahe hain

takiyon mein maze se so rahe hain

pahunchi hai hamari ab ye haalat

jo hanste the wo bhi ro rahe hain

tanha tah-e-KHak bhi hum hum

hasrat ke sath so rahe hain

sote hain lahad mein sone wale

jo jagte hain wo ro rahe hain

arbab-e-kamal chal base sab

sau mein kahin ek do rahe hain

palkon ki jhapak dikha ke ye but

dil mein nashtar chubho rahe hain

mujh dagh nasib ki lahad par

lale ka wo bij bo rahe hain

piri mein bhi hum hazar afsos

bachpan ki nind so rahe hain

daman se hum apne dagh-e-hasti

aab-e-KHanjar se dho rahe hain

main jag raha hun ai shab-e-gham

par mere nasib so rahe hain

roenge hamein rulane wale

Dubenge wo jo Dubo rahe hain

ai hashr madine mein na kar shor

chup chup sarkar so rahe hain

aaine pe bhi kaDi nigahen

kis par ye 'itab ho rahe hain

bhaari hai jo motiyon ka mala

aaTh aaTh aansu wo ro rahe hain

dil chhin ke ho gae hain ghafil

fitne wo jaga ke so rahe hain

hai ghair ke ghar jo un ki dawat

hum jaan se hath dho rahe hain

sad shukr KHayal hai usi ka

hum jis se lipaT ke so rahe hain

ho jaen na KHushk dagh ke phul

aansu un ko bhigo rahe hain

aaegi na phir ke 'umr-e-rafta

hum muft mein jaan kho rahe hain

kya girya-e-be-asar se hasil

is rone pe hum to ro rahe hain

fariyaad ki na-kHuda-e-kashti

kashti ko meri Dubo rahe hain

kyun karte hain gham-gusar taklif

aansu mere munh ko dho rahe hain

mahfil barKHast hai patinge

ruKHsat sham’on se ho rahe hain

hai kuch ka waqt aasman par

tare kahin nam ko rahe hain

un ki bhi numud hai koi dam

wo bhi na rahenge jo rahe hain

duniya ka ye rang aur hum ko

kuchh hosh nahin hai so rahe hain

Thahro dam-e-naza do gaDi aur

do chaar nafs hi to rahe hain

phul un ko pinha pinha ke aghyar

kanTe mere haq mein bo rahe hain

zanu pe 'amir' sar ko rakkhe

pahron guzre ki ro rahe hain