mehndi mal ke mera tark-e-sitam ijad aaya

mehñdī mal ke mirā tark-e-sitam ījād aayā

ḳhuuñ bahā haath meñ letā huā jallād aayā

bāġhbāñ aayā gulistāñ meñ na sayyād aayā

jo koī aayā mirī jaan ko jallād aayā

bā'd-e-marg aa.ī lab-e-gor farīdoñ se sadā

chain ab dāman-e-mādar kā hameñ yaad aayā

maiñ vo dīvāna huuñ rag-rag meñ chubhā nashtar-e-ġham

fasd bhī kholne aayā to ye fassād aayā

koh-o-sahrā kī taraf ham jo 'qalaq' jā nikle

qais-o-farhād lage kahne ki ustād aayā

mehndi mal ke mera tark-e-sitam ijad aaya

KHun baha hath mein leta hua jallad aaya

baghban aaya gulistan mein na sayyaad aaya

jo koi aaya meri jaan ko jallad aaya

ba'd-e-marg aai lab-e-gor faridon se sada

chain ab daman-e-madar ka hamein yaad aaya

main wo diwana hun rag-rag mein chubha nashtar-e-gham

fasd bhi kholne aaya to ye fassad aaya

koh-o-sahra ki taraf hum jo 'qalaq' ja nikle

qais-o-farhad lage kahne ki ustad aaya