ada se dekh lo jata rahe gila dil ka

adā se dekh lo jaatā rahe gila dil kā

bas ik nigāh pe Thahrā hai faisla dil kā

vo zulm karte haiñ mujh par to log kahte haiñ

ḳhudā bure se na Daale mu'āmala dil kā

hazār fasl-e-gul aa.e junūñ vo josh kahāñ

gayā shabāb ke hamrāh valvala dil kā

bahār aate hī kunj-e-qafas nasīb huā

hazār haif ki niklā na hausla dil kā

ḳhudā hī ḳhair kare aaj rañg-e-be-Dhab hai

bhaTak rahā hai ka.ī din se aabla dil kā

phirā jo kūcha-e-qātil se koī pūchheñge

sunā hai luT gayā raste meñ qāfila dil kā

ḳhudā ke sāmne apnā hai ai 'qalaq' insāf

butoñ se hashr meñ hogā mu'āmala dil kā

ada se dekh lo jata rahe gila dil ka

bas ek nigah pe Thahra hai faisla dil ka

wo zulm karte hain mujh par to log kahte hain

KHuda bure se na Dale mu'amala dil ka

hazar fasl-e-gul aae junun wo josh kahan

gaya shabab ke hamrah walwala dil ka

bahaar aate hi kunj-e-qafas nasib hua

hazar haif ki nikla na hausla dil ka

KHuda hi KHair kare aaj rang-e-be-Dhab hai

bhaTak raha hai kai din se aabla dil ka

phira jo kucha-e-qatil se koi puchhenge

suna hai luT gaya raste mein qafila dil ka

KHuda ke samne apna hai ai 'qalaq' insaf

buton se hashr mein hoga mu'amala dil ka