aankhon mein teri bazm-e-tamasha liye hue

āñkhoñ meñ terī bazm-e-tamāshā liye hue

jannat meñ bhī huuñ jannat-e-duniyā liye hue

pās-e-adab meñ josh-e-tamannā liye hue

maiñ bhī huuñ ik habāb meñ dariyā liye hue

kis tarh husn-e-dost hai be-parda āshakār

sad.hā hijāb sūrat-o-ma.anī liye hue

suufī ko hai mushāhida haq kā iddi’ā

sad.hā hijāb-e-dīda-e-bīnā liye hue

tū barq-e-husn aur tajallī hai ye gurez

maiñ ḳhaak aur zauq-e-tamāshā liye hue

rag-rag meñ aur kuchh na rahā juz ḳhayāl-e-dost

us shoḳh ko huuñ aaj sarāpā liye hue

'asġhar' hujūm-e-dard-e-ġharībī meñ is kī yaad

aa.ī hai ek tilism-e-tamannā liye hue

aankhon mein teri bazm-e-tamasha liye hue

jannat mein bhi hun jannat-e-duniya liye hue

pas-e-adab mein josh-e-tamanna liye hue

main bhi hun ek habab mein dariya liye hue

kis tarh husn-e-dost hai be-parda aashakar

sadha hijab surat-o-mani liye hue

sufi ko hai mushahida haq ka iddi’a

sadha hijab-e-dida-e-bina liye hue

tu barq-e-husn aur tajalli hai ye gurez

main KHak aur zauq-e-tamasha liye hue

rag-rag mein aur kuchh na raha juz KHayal-e-dost

us shoKH ko hun aaj sarapa liye hue

'asghar' hujum-e-dard-e-gharibi mein is ki yaad

aai hai ek tilism-e-tamanna liye hue