bas-ki dushwar hai har kaam ka aasan hona

bas-ki dushvār hai har kaam kā āsāñ honā

aadmī ko bhī muyassar nahīñ insāñ honā

girya chāhe hai ḳharābī mire kāshāne kī

dar-o-dīvār se Tapke hai bayābāñ honā

vā.e-dīvāngī-e-shauq ki har dam mujh ko

aap jaanā udhar aur aap hī hairāñ honā

jalva az-bas-ki taqāzā-e-nigah kartā hai

jauhar-e-ā.ina bhī chāhe hai mizhgāñ honā

’ishrat-e-qatl-gah-e-ahl-e-tamannā mat pūchh

’īd-e-nazzāra hai shamshīr kā 'uryāñ honā

le ga.e ḳhaak meñ ham dāġh-e-tamannā-e-nashāt

tū ho aur aap ba-sad-rañg-e-gulistāñ honā

’ishrat-e-pāra-e-dil zaḳhm-e-tamannā khānā

lazzat-e-rīsh-e-jigar ġharq-e-namak-dāñ honā

kī mire qatl ke baa'd us ne jafā se tauba

haa.e us zūd-pashemāñ kā pashemāñ honā

haif us chaar gireh kapḌe kī qismat 'ġhālib'

jis kī qismat meñ ho 'āshiq kā garebāñ honā

bas-ki dushwar hai har kaam ka aasan hona

aadmi ko bhi muyassar nahin insan hona

girya chahe hai KHarabi mere kashane ki

dar-o-diwar se Tapke hai bayaban hona

wae-diwangi-e-shauq ki har dam mujh ko

aap jaana udhar aur aap hi hairan hona

jalwa az-bas-ki taqaza-e-nigah karta hai

jauhar-e-aina bhi chahe hai mizhgan hona

’ishrat-e-qatl-gah-e-ahl-e-tamanna mat puchh

’id-e-nazzara hai shamshir ka 'uryan hona

le gae KHak mein hum dagh-e-tamanna-e-nashat

tu ho aur aap ba-sad-rang-e-gulistan hona

’ishrat-e-para-e-dil zaKHm-e-tamanna khana

lazzat-e-rish-e-jigar gharq-e-namak-dan hona

ki mere qatl ke ba'd us ne jafa se tauba

hae us zud-pasheman ka pasheman hona

haif us chaar gireh kapDe ki qismat 'ghaalib'

jis ki qismat mein ho 'ashiq ka gareban hona