be-fikr ji raha hun har ek etibar se

be-fikr jī rahā huuñ har ik e'tibār se

nisbat bhī kaisī chiiz hai dāmāñ yaar se

dāman rafū karūñ ki garebāñ rafū karūñ

josh-e-junūñ meñ kis ko siyūñ kis ke taar se

me.arāj bandagī kā vahī to maqām hai

ho rābta jabīñ ko jahāñ paa.e yaar se

duniyā samajh rahī hai ki ham piir ho ga.e

ḳham hoga.ī kamar jo gunāhoñ ke baar se

ai banda-e-ḳhudā tirā māhaul kuchh bhī ho

māyūs kyuuñ hai rahmat-e-parvardigār se

apnī ḳhushī se tark-e-tamannā bhī kyā karūñ

Takrāv chāhtā nahīñ manshā-e-yār se

'kāmil' sukūn maut hai kyuuñ maut māñgiye

apnī to zindagī hai dil-e-be-qarār se

be-fikr ji raha hun har ek e'tibar se

nisbat bhi kaisi chiz hai daman yar se

daman rafu karun ki gareban rafu karun

josh-e-junun mein kis ko siyun kis ke tar se

mearaj bandagi ka wahi to maqam hai

ho rabta jabin ko jahan pae yar se

duniya samajh rahi hai ki hum pir ho gae

KHam hogai kamar jo gunahon ke bar se

ai banda-e-KHuda tera mahaul kuchh bhi ho

mayus kyun hai rahmat-e-parwardigar se

apni KHushi se tark-e-tamanna bhi kya karun

Takraw chahta nahin mansha-e-yar se

'kaamil' sukun maut hai kyun maut mangiye

apni to zindagi hai dil-e-be-qarar se