خوب پہچان لیا ہم نے کہ ہاں ہاں ہے یہی

خوب پہچان لیا ہم نے کہ ہاں ہاں ہے یہی

اب نہ بھولیں گے اسے صورت جاناں ہے یہی

عشق میں راہبر منزلِ جاناں ہے یہی

شوق کہتے ہیں جسے مرشدِ پاکاں ہے یہی

غمزہ و ناز و ادا شوخیٔ و انداز خرام

تیغ کیا ہوگی مری قتل کاساماں ہے یہی

کلمۂ کفر پڑھاتا ہے مسلمانوں سے

عشق کہتے ہیں اسے دشمنِ ایماں ہے یہی

نہ اُدھر جا، ادھر شیخ کی مسجد ہے قریب

آ اِدھر پیر مغاں محفلِ رنداں ہے یہی

جس نے آئینہ کو حیران بنا رکھا ہے

دیکھ کر آپ کو آئینہ میں حیراں ہے یہی

دے کے دم تم نے سہیں جور و جفائیں بیدمؔ

کیا تعجب ہے وفاداروں کے شایاں ہے یہی