tu ne apna bana kar nazar pher li mere dil ka sukun na-gahan luT gaya

tū ne apnā banā kar nazar pher lī mere dil kā sukūñ nā-gahāñ luT gayā

mujh ko luuTā tire 'ishq ne jān-e-jāñ maiñ tire 'ishq meñ jān-e-jāñ luT gayā

chand tinke faqat merī jāgīr the vo bhī bād-e-ḳhizāñ luuT kar le ga.ī

maiñ ne dekhā na fasl-e-bahārī kā muñh maiñ qafas meñ rahā āshiyāñ luT gayā

maiñ ne luTne se pahle ye sochā ki maiñ raaz kī baat hī dil se kah kar laTūñ

raaz kī baat to rah ga.ī raaz meñ mujh se pahle merā rāz-dāñ luT gayā

dil merā 'ishq-bāzī meñ anjān thā aa gayā ik but-e-bevafā pe yūñhī

dil ne sochā na samjhā na pahchān kī us ko luTnā kahāñ thā kahāñ luT gayā

maiñ ne ḳhud ho ke luTnā gavārā kiyā samjhā terī ḳhushī ko maiñ apnī ḳhushī

maiñ ne tere ishāroñ kā rakkhā bharam tū ne chāhā jahāñ maiñ vahāñ luT gayā

husn vāloñ ne luuTā kuchh is vaar se hosh jaate rahe aabrū chhin ga.ī

mere luTne kā 'ālam na kuchh pochhiye maiñ sar-e-kū-e-husn-e-butāñ luT gayā

rah gayā mere luTne kā zinda nasha dhuum merī zamāne meñ har sū machī

vo jagah yādgār-e-mohabbat banī maiñ mohabbat kī ḳhātir jahāñ luT gayā

chashm-e-sāqī ne luuTā pilā ke nasha kufr-o-īmāñ kī sudh-budh na mujh ko rahī

maiñ huuñ 'anvar' vo rind-e-ḳharābāt jo ka.aba-o-dair ke darmiyāñ luT gayā

tu ne apna bana kar nazar pher li mere dil ka sukun na-gahan luT gaya

mujh ko luTa tere 'ishq ne jaan-e-jaan main tere 'ishq mein jaan-e-jaan luT gaya

chand tinke faqat meri jagir the wo bhi baad-e-KHizan luT kar le gai

main ne dekha na fasl-e-bahaari ka munh main qafas mein raha aashiyan luT gaya

main ne luTne se pahle ye socha ki main raaz ki baat hi dil se kah kar laTun

raaz ki baat to rah gai raaz mein mujh se pahle mera raaz-dan luT gaya

dil mera 'ishq-bazi mein anjaan tha aa gaya ek but-e-bewafa pe yunhi

dil ne socha na samjha na pahchan ki us ko luTna kahan tha kahan luT gaya

main ne KHud ho ke luTna gawara kiya samjha teri KHushi ko main apni KHushi

main ne tere ishaaron ka rakkha bharam tu ne chaha jahan main wahan luT gaya

husn walon ne luTa kuchh is war se hosh jate rahe aabru chhin gai

mere luTne ka 'alam na kuchh pochhiye main sar-e-ku-e-husn-e-butan luT gaya

rah gaya mere luTne ka zinda nasha dhum meri zamane mein har su machi

wo jagah yaadgar-e-mohabbat bani main mohabbat ki KHatir jahan luT gaya

chashm-e-saqi ne luTa pila ke nasha kufr-o-iman ki sudh-budh na mujh ko rahi

main hun 'anwar' wo rind-e-KHarabaat jo kaba-o-dair ke darmiyan luT gaya