bewafa se bhi pyar hota hai

bevafā se bhī pyaar hotā hai

yaar kuchh bhī ho yaar hotā hai

saath us ke jo hai raqīb to kyā

phuul ke saath ḳhaar hotā hai

jab vo hote haiñ sehn-e-gulshan meñ

mausam-e-nau-bahār hotā hai

kaash hote ham us ke phūloñ meñ

us gale kā jo haar hotā hai

dost se kyoñ bhalā na khāte fareb

dost pe e.atibār hotā hai

jab vo aate nahīñ shab-e-va.ada

maut kā intizār hotā hai

vasl meñ bhī ḳhayāl-e-hijr se dil

be-sukūñ be-qarār hotā hai

ham baḌe ḳhush-nasīb haiñ varna

aap ko kis se pyaar hotā hai

tiir vo tīr-e-nīm-kash to nahīñ

dil ke jo aar paar hotā hai

husn-e-aḳhlāq ai urūs-e-hayāt

sab se achchhā siñghār hotā hai

bewafa se bhi pyar hota hai

yar kuchh bhi ho yar hota hai

sath us ke jo hai raqib to kya

phul ke sath KHar hota hai

jab wo hote hain sehn-e-gulshan mein

mausam-e-nau-bahaar hota hai

kash hote hum us ke phulon mein

us gale ka jo haar hota hai

dost se kyon bhala na khate fareb

dost pe eatibar hota hai

jab wo aate nahin shab-e-wada

maut ka intizar hota hai

wasl mein bhi KHayal-e-hijr se dil

be-sukun be-qarar hota hai

hum baDe KHush-nasib hain warna

aap ko kis se pyar hota hai

tir wo tir-e-nim-kash to nahin

dil ke jo aar par hota hai

husn-e-aKHlaq ai urus-e-hayat

sab se achchha singhaar hota hai