ai falak de hum ko pura gham to khane ke liye

ai falak de ham ko puurā ġham to khāne ke liye

vo bhī hissa kar diyā saare zamāne ke liye

sar-guzasht apnī fasāna hai zamāne ke liye

ġham hue the ham jo un se yaad aane ke liye

paas apne dil ke rahne dījiye merā bhī dil

ik ḳhushī ko chāhiye ik ġham uThāne ke liye

bas rahā hai jī meñ tū bas nāznīñ nāzuk badan

ab kahāñ se lā.iye dil choT khāne ke liye

roz-e-mahshar kyā ye but be-kār hī rah jā.eñge

ik na ik fitna hai lāzim ik aane ke liye

mar ga.e to mar ga.e ham 'ishq meñ nāseh ko kyā

dil to aane ke liye hai jaan jaane ke liye

'dāġh' jannat ko sudhāro ab isī kūcha meñ hai

duur jaa.e paañv kyuuñ apne thakāne ke liye

ai falak de hum ko pura gham to khane ke liye

wo bhi hissa kar diya sare zamane ke liye

sar-guzasht apni fasana hai zamane ke liye

gham hue the hum jo un se yaad aane ke liye

pas apne dil ke rahne dijiye mera bhi dil

ek KHushi ko chahiye ek gham uThane ke liye

bas raha hai ji mein tu bas naznin nazuk badan

ab kahan se laiye dil choT khane ke liye

roz-e-mahshar kya ye but be-kar hi rah jaenge

ek na ek fitna hai lazim ek aane ke liye

mar gae to mar gae hum 'ishq mein naseh ko kya

dil to aane ke liye hai jaan jaane ke liye

'dagh' jannat ko sudhaaro ab isi kucha mein hai

dur jae panw kyun apne thakane ke liye