اے فلک دے ہم کو پورا غم تو کھانے کے لیے

اے فلک دے ہم کو پورا غم تو کھانے کے لیے

وہ بھی حصہ کر دیا سارے زمانے کے لیے

سر گذشت اپنی فسانہ ہے زمانے کے لیے

گم ہوئے تھے ہم جو ان سے یاد آنے کے لیے

پاس اپنے دل کے رہنے دیجیے میرا بھی دل

اک خوشی کو چاہیے اک غم اٹھانے کے لیے

بس رہا ہے جی میں تو بس نازنیں نازک بدن

اب کہاں سے لائے دل چوٹ کھانے کے لیے

روز محشر کیا یہ بت بیکار ہی رہ جائیں گے

اک نہ اک فتنہ ہے لازم اک آنے کے لیے

مر گیے تو مر گیے ہم عشق میں ناصح کو کیا

دل تو آنے کے لیے ہے جان جانے کے لیے

داغؔ جنت کو سدھارو اب اسی کوچہ میں ہے

دور جائے پاؤں کیوں اپنے تھکانے کے لیے