kahne deti nahin kuchh munh se mohabbat teri

kahne detī nahīñ kuchh muñh se mohabbat terī

lab pe rah jaatī hai aa aa ke shikāyat terī

ab terā ai dil-e-be-tāb ḳhudā hāfiz hai

kar chuke ham to mohabbat meñ hifāzat terī

yaad sab kuchh haiñ mujhe hijr ke sadme zālim

bhuul jaatā huuñ magar dekh ke sūrat terī

'adam ābād ko jaate haiñ bashar ḳhālī haath

mujh ko ye naaz hai ki le jā.ūñgā hasrat terī

hai raqīboñ kī zabāñ par bhī sitam kā shikva

tū bhī majbūr hai jaatī nahīñ 'ādat terī

dekhiye kartī hai rusvā.ī-e-zamāna kyā kyā

mujh ko ye chaah mirī tujh ko ye sūrat terī

kūcha-e-yār meñ bhī dil nahīñ lagtā ai 'dāġh'

dekhiye jā.egī kis roz ye vahshat terī

kahne deti nahin kuchh munh se mohabbat teri

lab pe rah jati hai aa aa ke shikayat teri

ab tera ai dil-e-be-tab KHuda hafiz hai

kar chuke hum to mohabbat mein hifazat teri

yaad sab kuchh hain mujhe hijr ke sadme zalim

bhul jata hun magar dekh ke surat teri

'adam aabaad ko jate hain bashar KHali hath

mujh ko ye naz hai ki le jaunga hasrat teri

hai raqibon ki zaban par bhi sitam ka shikwa

tu bhi majbur hai jati nahin 'adat teri

dekhiye karti hai ruswai-e-zamana kya kya

mujh ko ye chah meri tujh ko ye surat teri

kucha-e-yar mein bhi dil nahin lagta ai 'dagh'

dekhiye jaegi kis roz ye wahshat teri