کہنے دیتی نہیں کچھ منہ سے محبت تیری

کہنے دیتی نہیں کچھ منہ سے محبت تیری

لب پہ رہ جاتی ہے آ آ کے شکایت تیری

اب تیرا اے دل بیتاب خدا حافظ ہے

کر چکے ہم تو محبت میں حفاظت تیری

یاد سب کچھ ہیں مجھے ہجر کے صدمے ظالم

بھول جاتا ہوں مگر دیکھ کے صورت تیری

عدم آباد کو جاتے ہیں بشر خالی ہاتھ

مجھ کو یہ ناز ہے کہ لے جاؤں گا حسرت تیری

ہے رقیبوں کی زباں پر بھی ستم کا شکوہ

تو بھی مجبور ہے جاتی نہیں عادت تیری

دیکھیے کرتی ہے رسوائی زمانہ کیا کیا

مجھ کو یہ چاہ مری تجھ کو یہ صورت تیری

کوچۂ یار میں بھی دل نہیں لگتا اے داغؔ

دیکھیے جائے گی کس روز یہ وحشت تیری