KHatir se ya lihaz se main man to gaya

ḳhātir se yā lihāz se maiñ maan to gayā

jhūTī qasam se aap kā īmān to gayā

dil le ke muft kahte haiñ kuchh kaam kā nahīñ

ulTī shikāyateñ huiiñ ehsān to gayā

Dartā huuñ dekh kar dil-e-be-ārzū ko maiñ

sunsān ghar ye kyuuñ na ho mehmān to gayā

afshā-e-rāz 'ishq meñ go zillateñ huiiñ

lekin use jatā to diyā jaan to gayā

go nāma-bar se ḳhush na huā par hazār shukr

mujh ko vo mere naam se pahchān to gayā

dekhā hai but-kade meñ jo ai shaiḳh kuchh na pūchh

bazm-e-’adū meñ sūrat-e-parvāna dil mirā

hosh-o-hvās-o-tāb-o-tavāñ 'dāġh' jā chuke

ab ham bhī jaane vaale haiñ sāmān to gayā

KHatir se ya lihaz se main man to gaya

jhuTi qasam se aap ka iman to gaya

dil le ke muft kahte hain kuchh kaam ka nahin

ulTi shikayaten huin ehsan to gaya

Darta hun dekh kar dil-e-be-arzu ko main

sunsan ghar ye kyun na ho mehman to gaya

afsha-e-raaz 'ishq mein go zillaten huin

lekin use jata to diya jaan to gaya

go nama-bar se KHush na hua par hazar shukr

mujh ko wo mere nam se pahchan to gaya

dekha hai but-kade mein jo ai shaiKH kuchh na puchh

bazm-e-’adu mein surat-e-parwana dil mera

hosh-o-hwas-o-tab-o-tawan 'dagh' ja chuke

ab hum bhi jaane wale hain saman to gaya