daim paDa hua tere dar par nahin hun main

daa.im paḌā huā tire dar par nahīñ huuñ maiñ

ḳhaak aisī zindagī pe ki patthar nahīñ huuñ maiñ

kyuuñ gardish-e-mudām se ghabrā na jaa.e dil

insān huuñ pyāla-o-sāġhar nahīñ huuñ maiñ

yā-rab zamāna mujh ko miTātā hai kis liye

lauh-e-jahāñ pe harf-e-mukarrar maiñ huuñ maiñ

had chāhiye sazā meñ ’uqūbat ke vāste

āḳhir gunāhgār huuñ kāfir nahīñ huuñ maiñ

kis vāste 'azīz nahīñ jānte mujhe

lā’l-o-zamurrad-o-zar-o-gauhar nahīñ huuñ maiñ

rakhte ho tum qadam mirī āñkhoñ se kyuuñ dareġh

rutbe meñ mehr-o-māh se kam-tar nahīñ huuñ maiñ

karte ho mujh ko man.a-e-qadam-bos kis liye

kyā āsmān ke bhī barābar nahīñ huuñ maiñ

'ġhālib' vazīfa-ḳhvār ho do shaah ko du'ā

vo din ga.e ki kahte the naukar nahīñ huuñ maiñ

daim paDa hua tere dar par nahin hun main

KHak aisi zindagi pe ki patthar nahin hun main

kyun gardish-e-mudam se ghabra na jae dil

insan hun pyala-o-saghar nahin hun main

ya-rab zamana mujh ko miTata hai kis liye

lauh-e-jahan pe harf-e-mukarrar main hun main

had chahiye saza mein ’uqubat ke waste

aaKHir gunahgar hun kafir nahin hun main

kis waste 'aziz nahin jaante mujhe

la’l-o-zamurrad-o-zar-o-gauhar nahin hun main

rakhte ho tum qadam meri aankhon se kyun daregh

rutbe mein mehr-o-mah se kam-tar nahin hun main

karte ho mujh ko mana-e-qadam-bos kis liye

kya aasman ke bhi barabar nahin hun main

'ghaalib' wazifa-KHwar ho do shah ko du'a

wo din gae ki kahte the naukar nahin hun main