dard minnat-kash-e-dawa na hua

dard minnat-kash-e-davā na huā

maiñ na achchhā huā burā na huā

jam.a karte ho kyuuñ raqīboñ ko

ik tamāshā huā gila na huā

ham kahāñ qismat āzmāne jaa.eñ

tū hī jab ḳhanjar-āzmā na huā

kitne shīrīñ haiñ tere lab ki raqīb

gāliyāñ khā ke be-mazā na huā

hai ḳhabar garm un ke aane kī

aaj hī ghar meñ boriyā na huā

kyā vo namrūd kī ḳhudā.ī thī

bandagī meñ mirā bhalā na huā

jaan dī dī huī usī kī thī

haq to yuuñ hai ki haq adā na huā

zaḳhm gar dab gayā lahū na thamā

kaam gar ruk gayā ravā na huā

rahzanī hai ki dil-sitānī hai

le ke dil dil-sitāñ ravāna huā

kuchh to paḌhiye ki log kahte haiñ

aaj 'ġhālib' ġhazal-sarā na huā

dard minnat-kash-e-dawa na hua

main na achchha hua bura na hua

jama karte ho kyun raqibon ko

ek tamasha hua gila na hua

hum kahan qismat aazmane jaen

tu hi jab KHanjar-azma na hua

kitne shirin hain tere lab ki raqib

galiyan kha ke be-maza na hua

hai KHabar garm un ke aane ki

aaj hi ghar mein boriya na hua

kya wo namrud ki KHudai thi

bandagi mein mera bhala na hua

jaan di di hui usi ki thi

haq to yun hai ki haq ada na hua

zaKHm gar dab gaya lahu na thama

kaam gar ruk gaya rawa na hua

rahzani hai ki dil-sitani hai

le ke dil dil-sitan rawana hua

kuchh to paDhiye ki log kahte hain

aaj 'ghaalib' ghazal-sara na hua