dard se mere hai tujhko be-qarari hae hae

dard se mere hai tujh ko be-qarārī haa.e haa.e

kyā huī zālim tirī ġhaflat-shi’ārī haa.e haa.e

tere dil meñ gar na thā āshob-e-ġham kā hausla

tū ne phir kyuuñ kī thī merī ġham-gusārī haa.e haa.e

kyuuñ mirī ġham-ḳhvārgī kā tujh ko huuñ thā ḳhayāl

dushmanī apnī thī merī dost-dārī haa.e haa.e

'umr-bhar kā tū ne paimān-e-vafā bāñdhā to kyā

'umr ko bhī to nahīñ hai pā.edārī haa.e haa.e

zahr lagtī hai mujhe āb-o-havā-e-zindagī

yā'nī tujh se thī use nā-sāzgārī haa.e haa.e

gul-fishānī-hā-e-nāz-e-jalva ko kyā ho gayā

ḳhaak par hotī hai terī lāla-kārī haa.e haaye

sharm-e-rusvā.ī se jā chhupnā naqāb-e-ḳhāk meñ

ḳhatm hai ulfat kī tujh par parda-dārī haa.e haa.e

ḳhaak meñ nāmūs-e-paimān-e-mohabbat mil ga.ī

uTh ga.ī duniyā se rāh-o-rasm-e-yārī haa.e haa.e

haath hī teġh-āzmā kā kaam se jaatā rahā

dil pe ik lagne na paayā zaḳhm-e-kārī haa.e haa.e

kis tarah kaaTe koī shab-hā-e-tār-e-barshigāl

hai nazar ḳhū-karda-e-aḳhtar-shumārī haa.e haa.e

gosh mah.jūr-e-payām-o-chashm-e-mahrūm-e-jamāl

ek dil tis par ye nā-ummīd-vārī haa.e haa.e

'ishq ne pakḌā na thā 'ġhālib' abhī vahshat kā rañg

rah gayā thā dil meñ jo kuchh zauq-e-ḳhvārī haa.e haa.e

dard se mere hai tujh ko be-qarari hae hae

kya hui zalim teri ghaflat-shi’ari hae hae

tere dil mein gar na tha aashob-e-gham ka hausla

tu ne phir kyun ki thi meri gham-gusari hae hae

kyun meri gham-KHwargi ka tujh ko hun tha KHayal

dushmani apni thi meri dost-dari hae hae

'umr-bhar ka tu ne paiman-e-wafa bandha to kya

'umr ko bhi to nahin hai paedari hae hae

zahr lagti hai mujhe aab-o-hawa-e-zindagi

ya'ni tujh se thi use na-sazgari hae hae

gul-fishani-ha-e-naz-e-jalwa ko kya ho gaya

KHak par hoti hai teri lala-kari hae haye

sharm-e-ruswai se ja chhupna naqab-e-KHak mein

KHatm hai ulfat ki tujh par parda-dari hae hae

KHak mein namus-e-paiman-e-mohabbat mil gai

uTh gai duniya se rah-o-rasm-e-yari hae hae

hath hi tegh-azma ka kaam se jata raha

dil pe ek lagne na paya zaKHm-e-kari hae hae

kis tarah kaTe koi shab-ha-e-tar-e-barshigal

hai nazar KHu-karda-e-aKHtar-shumari hae hae

gosh mahjur-e-payam-o-chashm-e-mahrum-e-jamal

ek dil tis par ye na-ummid-wari hae hae

'ishq ne pakDa na tha 'ghaalib' abhi wahshat ka rang

rah gaya tha dil mein jo kuchh zauq-e-KHwari hae hae