dekhna qismat ki aap apne pe rashk aa jae hai

dekhnā qismat ki aap apne pe rashk aa jaa.e hai

maiñ use dekhūñ bhalā kab mujh se dekhā jaa.e hai

haath dho dil se yahī garmī gar andeshe meñ hai

ābgīna tundi-e-sahbā se pighlā jaa.e hai

ġhair ko yā rab vo kyūñkar man’-e-gustāḳhī kare

gar hayā bhī us ko aatī hai to sharmā jaa.e hai

shauq ko ye lat ki har dam naala khīñche jā.iye

dil kī vo hālat ki dam lene se ghabrā jaa.e hai

duur chashm-e-bad tirī bazm-e-tarab se vaah vaah

naġhma ho jaatā hai vaañ gar naala merā jaa.e hai

garche hai tarz-e-taġhāful parda-dār-e-rāz-e-’ishq

par ham aise kho.e jaate haiñ ki vo pā jaa.e hai

us kī bazm-ārā.iyāñ sun kar dil-e-ranjūr yaañ

misl-e-naqsh-e-mudd’ā-e-ġhair baiThā jaa.e hai

ho ke 'āshiq vo parī-ruḳh aur nāzuk ban gayā

rañg khultā jaa.e hai jitnā ki uḌtā jaa.e hai

naqsh ko us ke musavvir par bhī kyā kyā naaz haiñ

khīñchtā hai jis qadar utnā hī khiñchtā jaa.e hai

saaya merā mujh se misl-e-dūd bhāge hai 'asad'

paas mujh ātish-ba-jāñ ke kis se Thahrā jaa.e hai

dekhna qismat ki aap apne pe rashk aa jae hai

main use dekhun bhala kab mujh se dekha jae hai

hath dho dil se yahi garmi gar andeshe mein hai

aabgina tundi-e-sahba se pighla jae hai

ghair ko ya rab wo kyunkar man’-e-gustaKHi kare

gar haya bhi us ko aati hai to sharma jae hai

shauq ko ye lat ki har dam nala khinche jaiye

dil ki wo haalat ki dam lene se ghabra jae hai

dur chashm-e-bad teri bazm-e-tarab se wah wah

naghma ho jata hai wan gar nala mera jae hai

garche hai tarz-e-taghaful parda-dar-e-raaz-e-’ishq

par hum aise khoe jate hain ki wo pa jae hai

us ki bazm-araiyan sun kar dil-e-ranjur yan

misl-e-naqsh-e-mudd’a-e-ghair baiTha jae hai

ho ke 'ashiq wo pari-ruKH aur nazuk ban gaya

rang khulta jae hai jitna ki uDta jae hai

naqsh ko us ke musawwir par bhi kya kya naz hain

khinchta hai jis qadar utna hi khinchta jae hai

saya mera mujh se misl-e-dud bhage hai 'asad'

pas mujh aatish-ba-jaan ke kis se Thahra jae hai