dekhnā qismat ki aap apne pe rashk aa jae hai

dekhnā qismat ki aap apne pe rashk aa jaa.e hai

maiñ use dekhūñ bhalā kab mujh se dekhā jaa.e hai

haath dho dil se yahī garmī gar andeshe meñ hai

ābgīna tundi-e-sahbā se pighlā jaa.e hai

ġhair ko yā rab vo kyūñkar mana-e-gustāḳhī kare

gar hayā bhī us ko aatī hai to sharmā jaa.e hai

shauq ko ye lat ki har dam naala khīñche jā.iye

dil kī vo hālat ki dam lene se ghabrā jaa.e hai

duur chashm-e-bad tirī bazm-e-tarab se vaah vaah

naġhma ho jaatā hai vaañ gar naala merā jaa.e hai

garche hai tarz-e-taġhāful parda-dār-e-rāz-e-ishq

par ham aise kho.e jaate haiñ ki vo pā jaa.e hai

us kī bazm-ārā.iyāñ sun kar dil-e-ranjūr yaañ

misl-e-naqsh-e-mudda.ā-e-ġhair baiThā jaa.e hai

ho ke āshiq vo parī-ruḳh aur nāzuk ban gayā

rañg khultā jaa.e hai jitnā ki uḌtā jaa.e hai

naqsh ko us ke musavvir par bhī kyā kyā naaz haiñ

khīñchtā hai jis qadar utnā hī khiñchtā jaa.e hai

saaya merā mujh se misl-e-dūd bhāge hai 'asad'

paas mujh ātish-ba-jāñ ke kis se Thahrā jaa.e hai

dekhnā qismat ki aap apne pe rashk aa jae hai

maiñ use dekhūñ bhalā kab mujh se dekhā jae hai

hath dho dil se yahī garmī gar andeshe meñ hai

ābgīna tundi-e-sahbā se pighlā jae hai

ġhair ko yā rab wo kyūñkar mana-e-gustāḳhī kare

gar hayā bhī us ko aatī hai to sharmā jae hai

shauq ko ye lat ki har dam nala khīñche jāiye

dil kī wo hālat ki dam lene se ghabrā jae hai

dur chashm-e-bad tirī bazm-e-tarab se wah wah

naġhma ho jatā hai wañ gar nala merā jae hai

garche hai tarz-e-taġhāful parda-dār-e-rāz-e-ishq

par hum aise khoe jate haiñ ki wo pā jae hai

us kī bazm-ārāiyāñ sun kar dil-e-ranjūr yañ

misl-e-naqsh-e-muddaā-e-ġhair baiThā jae hai

ho ke āshiq wo parī-ruḳh aur nāzuk ban gayā

rañg khultā jae hai jitnā ki uḌtā jae hai

naqsh ko us ke musawwir par bhī kyā kyā naz haiñ

khīñchtā hai jis qadar utnā hī khiñchtā jae hai

saya merā mujh se misl-e-dūd bhāge hai 'asad'

pas mujh ātish-ba-jāñ ke kis se Thahrā jae hai