din se dur na mazhab se alag baiTha hun

diin se duur na maz.hab se alag baiThā huuñ

terī dahlīz pe huuñ sab se alag baiThā huuñ

Dhañg kī baat kahe koī to bolūñ maiñ bhī

matlabī huuñ kisī matlab se alag baiThā huuñ

bazm-e-ahbāb meñ hāsil na huā chain mujhe

mutma.in dil hai bahut jab se alag baiThā huuñ

ġhair se duur magar us kī nigāhoñ ke qarīñ

mahfil-e-yār meñ is Dhab se alag baiThā huuñ

yahī maslak hai mirā aur yahī merā maqām

aaj tak ḳhvāhish-e-mansab se alag baiThā huuñ

'umr karatā huuñ basar gosha-e-tanhā.ī meñ

jab se vo ruuTh ga.e tab se alag baiThā huuñ

merā andāz 'nasīr' ahl-e-jahāñ se hai judā

sab meñ shāmil huuñ magar sab se alag baiThā huuñ

din se dur na mazhab se alag baiTha hun

teri dahliz pe hun sab se alag baiTha hun

Dhang ki baat kahe koi to bolun main bhi

matlabi hun kisi matlab se alag baiTha hun

bazm-e-ahbab mein hasil na hua chain mujhe

mutmain dil hai bahut jab se alag baiTha hun

ghair se dur magar us ki nigahon ke qarin

mahfil-e-yar mein is Dhab se alag baiTha hun

yahi maslak hai mera aur yahi mera maqam

aaj tak KHwahish-e-mansab se alag baiTha hun

'umr karata hun basar gosha-e-tanhai mein

jab se wo ruTh gae tab se alag baiTha hun

mera andaz 'nasir' ahl-e-jahan se hai juda

sab mein shamil hun magar sab se alag baiTha hun