dil-e-nadan tujhe hua kya hai

dil-e-nādāñ tujhe huā kyā hai

āḳhir is dard kī davā kyā hai

ham haiñ mushtāq aur vo be-zār

yā ilāhī ye mājrā kyā hai

maiñ bhī muñh meñ zabān rakhtā huuñ

kaash pūchho ki mudda'ā kyā hai

jab ki tujh bin nahīñ koī maujūd

phir ye hañgāma ai ḳhudā kyā hai

ye parī-chehra log kaise haiñ

ġhamza-o-’ishva-o-adā kyā hai

shikan-e-zulf-e-ambarīñ kyuuñ hai

nigah-e-chashm-e-surma sā kyā hai

sabza-o-gul kahāñ se aa.e haiñ

abr kyā chiiz hai havā kyā hai

ham ko un se vafā kī hai ummīd

jo nahīñ jānte vafā kyā hai

haañ bhalā kar tirā bhalā hogā

aur darvesh kī sadā kyā hai

jaan tum par nisār kartā huuñ

maiñ nahīñ jāntā du'ā kyā hai

maiñ ne maanā ki kuchh nahīñ 'ġhālib'

muft haath aa.e to burā kyā hai

dil-e-nadan tujhe hua kya hai

aaKHir is dard ki dawa kya hai

hum hain mushtaq aur wo be-zar

ya ilahi ye majra kya hai

main bhi munh mein zaban rakhta hun

kash puchho ki mudda'a kya hai

jab ki tujh bin nahin koi maujud

phir ye hangama ai KHuda kya hai

ye pari-chehra log kaise hain

ghamza-o-’ishwa-o-ada kya hai

shikan-e-zulf-e-ambarin kyun hai

nigah-e-chashm-e-surma sa kya hai

sabza-o-gul kahan se aae hain

abr kya chiz hai hawa kya hai

hum ko un se wafa ki hai ummid

jo nahin jaante wafa kya hai

han bhala kar tera bhala hoga

aur darwesh ki sada kya hai

jaan tum par nisar karta hun

main nahin jaanta du'a kya hai

main ne mana ki kuchh nahin 'ghaalib'

muft hath aae to bura kya hai