dil se teri nigah jigar tak utar gai

dil se tirī nigāh jigar tak utar ga.ī

donoñ ko ik adā meñ razā-mand kar ga.ī

shaq ho gayā hai siina ḳhushā lazzat-e-farāġh

taklīf-e-parda-dāri-e-zaḳhm-e-jigar ga.ī

vo bāda-e-shabāna kī sarmastiyāñ kahāñ

uThiye bas ab ki lazzat-e-ḳhvāb-e-sahar ga.ī

uḌtī phire hai ḳhaak mirī kū-e-yār meñ

baare ab ai havā havas-e-bāl-o-par ga.ī

dekho to dil-farebi-e-andāz-e-naqsh-e-pā

mauj-e-ḳhirām-e-yār bhī kyā gul katar ga.ī

har bul-havas ne husn-parastī shi'ār kī

ab ābrū-e-sheva-e-ahl-e-nazar ga.ī

nazzāre ne bhī kaam kiyā vaañ naqāb kā

mastī se har nigah tire ruḳh par bikhar ga.ī

fardā-o-dī kā tafraqa yak baar miT gayā

kal tum ga.e ki ham pe qayāmat guzar ga.ī

maarā zamāne ne asadullāh ḳhaañ tumhī

vo valvale kahāñ vo javānī kidhar ga.ī

dil se teri nigah jigar tak utar gai

donon ko ek ada mein raza-mand kar gai

shaq ho gaya hai sina KHusha lazzat-e-faragh

taklif-e-parda-dari-e-zaKHm-e-jigar gai

wo baada-e-shabana ki sarmastiyan kahan

uThiye bas ab ki lazzat-e-KHwab-e-sahar gai

uDti phire hai KHak meri ku-e-yar mein

bare ab ai hawa hawas-e-baal-o-par gai

dekho to dil-farebi-e-andaz-e-naqsh-e-pa

mauj-e-KHiram-e-yar bhi kya gul katar gai

har bul-hawas ne husn-parasti shi'ar ki

ab aabru-e-shewa-e-ahl-e-nazar gai

nazzare ne bhi kaam kiya wan naqab ka

masti se har nigah tere ruKH par bikhar gai

farda-o-di ka tafraqa yak bar miT gaya

kal tum gae ki hum pe qayamat guzar gai

mara zamane ne asadullah KHan tumhi

wo walwale kahan wo jawani kidhar gai