dil soz se Khaali hai nigah pak nahin hai

dil soz se ḳhālī hai nigah paak nahīñ hai

phir is meñ 'ajab kyā ki tū bebāk nahīñ hai

hai zauq-e-tajallī bhī isī ḳhaak meñ pinhāñ

ġhāfil tū nirā sāhib-e-idrāk nahīñ hai

vo aañkh ki hai surma-e-afrañg se raushan

pur-kār-o-sukHan-sāz hai namnāk nahīñ hai

kyā sūfī-o-mullā ko ḳhabar mere junūñ kī

un kā sar-e-dāman bhī abhī chaak nahīñ hai

kab tak rahe mahkūmi-e-anjum meñ mirī ḳhaak

yā maiñ nahīñ yā gardish-e-aflāk nahīñ hai

bijlī huuñ nazar koh-o-bayābāñ pe hai merī

mere liye shāyāñ ḳhas-o-ḳhāshāk nahīñ hai

'ālam hai faqat momin-e-jāñ-bāz kī mīrās

momin nahīñ jo sāhib-e-laulāk nahīñ hai

dil soz se KHali hai nigah pak nahin hai

phir is mein 'ajab kya ki tu bebak nahin hai

hai zauq-e-tajalli bhi isi KHak mein pinhan

ghafil tu nira sahib-e-idrak nahin hai

wo aankh ki hai surma-e-afrang se raushan

pur-kar-o-sukHan-saz hai namnak nahin hai

kya sufi-o-mulla ko KHabar mere junun ki

un ka sar-e-daman bhi abhi chaak nahin hai

kab tak rahe mahkumi-e-anjum mein meri KHak

ya main nahin ya gardish-e-aflak nahin hai

bijli hun nazar koh-o-bayaban pe hai meri

mere liye shayan KHas-o-KHashak nahin hai

'alam hai faqat momin-e-jaan-baz ki miras

momin nahin jo sahib-e-laulak nahin hai