main azal hi se gham-e-ishq-e-faramosh na tha

maiñ azal hī se ġham-e-'ishq-e-farāmosh na thā

us zamāna meñ ga.e hosh ki jab hosh na thā

hazrat-e-'ishq ko allāh salāmat rakkhe

jalva-e-husn jo dekhā to mujhe hosh na thā

kyuuñ mujhe bhuul gayā vaqt-e-karam dāvar-e-hashr

ḳhud-farāmosh thā maiñ yār-farāmosh na thā

'ālam-e-she'r meñ hotī thī mirī 'umr basar

she'r kahne kā bhī jis vaqt mujhe hosh na thā

ek ye vaqt bhī ab hai ki mujhe maut nahīñ

ek vo vaqt bhī guzrā hai mujhe hosh na thā

kaun sā mo'jiza aisā thā jo ai hazrat-e-'ishq

jumbish-e-lab meñ kisī shoḳh kī rū-posh na thā

haaye kyā chiiz thā vo 'ahd-e-tamannā merā

jab kisī baat kā duniyā meñ mujhe hosh na thā

vo bhī kyā din the ki jab husn thā un kā mā'sūm

vo bhī kyā din the ki jab 'ishq ko kuchh hosh na thā

haañ idhar dekh tujhe apnī nigāhoñ kī qasam

aaj mai-ḳhāna meñ baaqī koī mai-nosh na thā

haaye vo sādgi-e-husn kā tere 'ālam

jab ki ḳhud apnī adāoñ kā tujhe hosh na thā

ik zamāna thā ki karatā thā jigar ke TukḌe

ik zamāna thā ki 'dil-gīr' bhī bā-hosh na thā

main azal hi se gham-e-'ishq-e-faramosh na tha

us zamana mein gae hosh ki jab hosh na tha

hazrat-e-'ishq ko allah salamat rakkhe

jalwa-e-husn jo dekha to mujhe hosh na tha

kyun mujhe bhul gaya waqt-e-karam dawar-e-hashr

KHud-faramosh tha main yar-faramosh na tha

'alam-e-she'r mein hoti thi meri 'umr basar

she'r kahne ka bhi jis waqt mujhe hosh na tha

ek ye waqt bhi ab hai ki mujhe maut nahin

ek wo waqt bhi guzra hai mujhe hosh na tha

kaun sa mo'jiza aisa tha jo ai hazrat-e-'ishq

jumbish-e-lab mein kisi shoKH ki ru-posh na tha

haye kya chiz tha wo 'ahd-e-tamanna mera

jab kisi baat ka duniya mein mujhe hosh na tha

wo bhi kya din the ki jab husn tha un ka ma'sum

wo bhi kya din the ki jab 'ishq ko kuchh hosh na tha

han idhar dekh tujhe apni nigahon ki qasam

aaj mai-KHana mein baqi koi mai-nosh na tha

haye wo sadgi-e-husn ka tere 'alam

jab ki KHud apni adaon ka tujhe hosh na tha

ek zamana tha ki karata tha jigar ke TukDe

ek zamana tha ki 'dil-gir' bhi ba-hosh na tha