diwangi se dosh pe zunnar bhi nahin

dīvāngī se dosh pe zunnār bhī nahīñ

yā'nī hamāre jeb meñ ik taar bhī nahīñ

dil ko niyāz-e-hasrat-e-dīdār kar chuke

dekhā to ham meñ tāqat-e-dīdār bhī nahīñ

milnā tirā agar nahīñ āsāñ to sahl hai

dushvār to yahī hai ki dushvār bhī nahīñ

be-'ishq 'umr kaT nahīñ saktī hai aur yaañ

tāqat ba-qadar-e-lazzat-e-āzār bhī nahīñ

shorīdgī ke haath se hai sar vabāl-e-dosh

sahrā meñ ai ḳhudā koī dīvār bhī nahīñ

gunjā.ish-e-’adāvat-e-aġhyār yak taraf

yaañ dil meñ zo'f se havas-e-yār bhī nahīñ

Dar nāla-hā-e-zār se mere ḳhudā ko maan

āḳhir navā-e-murġh-e-giraftār bhī nahīñ

dil meñ hai yaar kī saf-e-mizhgāñ se rū-kashī

hālāñki tāqat-e-ḳhalish-e-ḳhār bhī nahīñ

is sādgī pe kaun na mar jaa.e ai ḳhudā

laḌte haiñ aur haath meñ talvār bhī nahīñ

dekhā 'asad' ko ḳhalvat-o-jalvat meñ bārhā

dīvāna gar nahīñ hai to hushyār bhī nahīñ

diwangi se dosh pe zunnar bhi nahin

ya'ni hamare jeb mein ek tar bhi nahin

dil ko niyaz-e-hasrat-e-didar kar chuke

dekha to hum mein taqat-e-didar bhi nahin

milna tera agar nahin aasan to sahl hai

dushwar to yahi hai ki dushwar bhi nahin

be-'ishq 'umr kaT nahin sakti hai aur yan

taqat ba-qadar-e-lazzat-e-azar bhi nahin

shoridgi ke hath se hai sar wabaal-e-dosh

sahra mein ai KHuda koi diwar bhi nahin

gunjaish-e-’adawat-e-aghyar yak taraf

yan dil mein zo'f se hawas-e-yar bhi nahin

Dar nala-ha-e-zar se mere KHuda ko man

aaKHir nawa-e-murgh-e-giraftar bhi nahin

dil mein hai yar ki saf-e-mizhgan se ru-kashi

haalanki taqat-e-KHalish-e-KHar bhi nahin

is sadgi pe kaun na mar jae ai KHuda

laDte hain aur hath mein talwar bhi nahin

dekha 'asad' ko KHalwat-o-jalwat mein barha

diwana gar nahin hai to hushyar bhi nahin