dost gham-KHwari mein meri sai farmawenge kya

dost ġham-ḳhvārī meñ merī sa'ī farmāveñge kyā

zaḳhm ke bharte talak nāḳhun na baḌh jāveñge kyā

be-niyāzī had se guzrī banda-parvar kab talak

ham kaheñge hāl-e-dil aur aap farmāveñge kyā

hazrat-e-nāseh gar aaveñ dīda-o-dil farsh-e-rāh

koī mujh ko ye to samjhā do ki samajhāveñge kyā

aaj vaañ teġh-o-kafan bāñdhe huve jaatā huuñ maiñ

'uzr mere qatl karne meñ vo ab lāveñge kyā

gar kiyā nāseh ne ham ko qaid achchhā yuuñ sahī

ye junūn-e-'ishq ke andāz chhuT jāveñge kyā

ḳhāna-zād-e-zulf haiñ zanjīr se bhāgeñge kyuuñ

haiñ giraftār-e-vafā zindāñ se ghabarāveñge kyā

hai ab is mā’mūra meñ qaht-e-ġham-e-ulfat 'asad'

ham ne ye maanā ki dillī meñ raheñ khāveñge kyā

dost gham-KHwari mein meri sa'i farmawenge kya

zaKHm ke bharte talak naKHun na baDh jawenge kya

be-niyazi had se guzri banda-parwar kab talak

hum kahenge haal-e-dil aur aap farmawenge kya

hazrat-e-naseh gar aawen dida-o-dil farsh-e-rah

koi mujh ko ye to samjha do ki samajhawenge kya

aaj wan tegh-o-kafan bandhe huwe jata hun main

'uzr mere qatl karne mein wo ab lawenge kya

gar kiya naseh ne hum ko qaid achchha yun sahi

ye junun-e-'ishq ke andaz chhuT jawenge kya

KHana-zad-e-zulf hain zanjir se bhagenge kyun

hain giraftar-e-wafa zindan se ghabarawenge kya

hai ab is ma’mura mein qaht-e-gham-e-ulfat 'asad'

hum ne ye mana ki dilli mein rahen khawenge kya