dost ġham-ḳhwārī meñ merī saī farmāweñge kyā

dost ġham-ḳhvārī meñ merī sa.ī farmāveñge kyā

zaḳhm ke bharte talak nāḳhun na baḌh jāveñge kyā

be-niyāzī had se guzrī banda-parvar kab talak

ham kaheñge hāl-e-dil aur aap farmāveñge kyā

hazrat-e-nāseh gar aaveñ diida o dil farsh-e-rāh

koī mujh ko ye to samjhā do ki samajhāveñge kyā

aaj vaañ teġh o kafan bāñdhe hue jaatā huuñ maiñ

uzr mere qatl karne meñ vo ab lāveñge kyā

gar kiyā nāseh ne ham ko qaid achchhā yuuñ sahī

ye junūn-e-ishq ke andāz chhuT jāveñge kyā

ḳhāna-zād-e-zulf haiñ zanjīr se bhāgeñge kyuuñ

haiñ giraftār-e-vafā zindāñ se ghabarāveñge kyā

hai ab is māmūre meñ qaht-e-ġham-e-ulfat 'asad'

ham ne ye maanā ki dillī meñ raheñ khāveñge kyā

dost ġham-ḳhwārī meñ merī saī farmāweñge kyā

zaḳhm ke bharte talak nāḳhun na baḌh jāweñge kyā

be-niyāzī had se guzrī banda-parwar kab talak

hum kaheñge hāl-e-dil aur aap farmāweñge kyā

hazrat-e-nāseh gar aaweñ dida o dil farsh-e-rāh

koī mujh ko ye to samjhā do ki samajhāweñge kyā

aaj wañ teġh o kafan bāñdhe hue jatā huñ maiñ

uzr mere qatl karne meñ wo ab lāweñge kyā

gar kiyā nāseh ne hum ko qaid achchhā yuñ sahī

ye junūn-e-ishq ke andāz chhuT jāweñge kyā

ḳhāna-zād-e-zulf haiñ zanjīr se bhāgeñge kyuñ

haiñ giraftār-e-wafā zindāñ se ghabarāweñge kyā

hai ab is māmūre meñ qaht-e-ġham-e-ulfat 'asad'

hum ne ye manā ki dillī meñ raheñ khāweñge kyā