درد سہہ کر بھی ترا نام لیے جاتے ہیں

درد سہہ کر بھی ترا نام لیے جاتے ہیں

تیرے دیوانے تجھے یاد کیے جاتے ہیں

ہم تو میخوارِ محبت میں ہمیں جام سے کیا

وہ پلاتے ہیں نگاہوں سے، پیے جاتے ہیں

ایک ہم ہیں کہ ہمیں پاسِ وفا کچھ بھی نہیں

ایک وہ ہیں کہ کرم ہم پہ کیے جاتے ہیں

دردِ الفت کا یہ اندازِ وفا کیا خوب

میں تڑپتا ہوں وہ تسکین دیے جاتے ہیں

ان سے کہتے نہیں کیوں جلوہ دکھایا تم نے

لوگ دیوانے کو الزام دیے جاتے ہیں

خود وہ دیوانہ بناتے ہیں محبت میں مجھے

خود مرا چاکِ گریبان سیے جاتے ہیں

تو نوازے نہ نوازے تری مرضی ہے دوست!

ہم تو سجدے تیری چوکھٹ پہ کیے جاتے ہیں

اے فناؔ عشق کا دستور بھلا کی سمجھو

عشق میں دل ہی نہیں سر بھی دیے جاتے ہیں