dard sah kar bhi tera nam liye jate hain

dard sah kar bhī tirā naam liye jaate haiñ

tere dīvāne tujhe yaad kiye jaate haiñ

ham to mai-ḳhvār-e-mohabbat haiñ hameñ jaam se kyā

vo pilāte haiñ nigāhoñ se piye jaate haiñ

ek ham haiñ ki hameñ pās-e-vafā kuchh bhī nahīñ

ek vo haiñ ki karam ham pe kiye jaate haiñ

dard ulfat kā ye andāz-e-vafā kyā ḳhuub

maiñ taḌaptā huuñ vo taskīn diye jaate haiñ

un se kahte nahīñ kyuuñ jalva dikhāyā tum ne

log dīvāne ko ilzām diye jaate haiñ

ḳhud vo dīvāna banāte haiñ mohabbat meñ mujhe

ḳhud mirā chaak garebān siye jaate haiñ

to navāze na navāze tirī marzī hai dost

ham to sajde terī chaukhaT pe kiye jaate haiñ

ai 'fanā' 'ishq kā dastūr bhalā kī samjho

'ishq meñ dil hī nahīñ sar bhī diye jaate haiñ

dard sah kar bhi tera nam liye jate hain

tere diwane tujhe yaad kiye jate hain

hum to mai-KHwar-e-mohabbat hain hamein jam se kya

wo pilate hain nigahon se piye jate hain

ek hum hain ki hamein pas-e-wafa kuchh bhi nahin

ek wo hain ki karam hum pe kiye jate hain

dard ulfat ka ye andaz-e-wafa kya KHub

main taDapta hun wo taskin diye jate hain

un se kahte nahin kyun jalwa dikhaya tum ne

log diwane ko ilzam diye jate hain

KHud wo diwana banate hain mohabbat mein mujhe

KHud mera chaak gareban siye jate hain

to nawaze na nawaze teri marzi hai dost

hum to sajde teri chaukhaT pe kiye jate hain

ai 'fana' 'ishq ka dastur bhala ki samjho

'ishq mein dil hi nahin sar bhi diye jate hain