maine ye bandagi ka tariqa bana liya

maiñ ne ye bandagī kā tarīqa banā liyā

apne sanam ko yaad kiyā sar jhukā liyā

puujā butān-e-dahr ko tasbīh toḌ kar

ulfat meñ apne aap ko kāfir banā liyā

dar dar bhaTak rahe the musalmāñ the jab talak

kāfir hue to manzil-e-maqsad ko pā liyā

kā'ba kisī kā naaz uThā.e to ham ko kyā

ham ne to us kī yaad ko kā'ba banā liyā

ab ārzū-e-duniyā-o-'uqbā nahīñ rahī

tū ne karam kiyā mujhe apnā banā liyā

kā'be meñ shaiḳh tujh ko ḳhudā kī hai justujū

ham ne butoñ ke dar se ḳhudā kā patā liyā

jo be-qarāriyāñ thiiñ vo taskīn ban ga.iiñ

jab dard-e-lā-davā ko masīhā banā liyā

vo aur hoñge maut jinheñ kar ga.ī 'fanā'

maiñ ne fanā kī raah se dars-e-baqā liyā

main ne ye bandagi ka tariqa bana liya

apne sanam ko yaad kiya sar jhuka liya

puja butan-e-dahr ko tasbih toD kar

ulfat mein apne aap ko kafir bana liya

dar dar bhaTak rahe the musalman the jab talak

kafir hue to manzil-e-maqsad ko pa liya

ka'ba kisi ka naz uThae to hum ko kya

hum ne to us ki yaad ko ka'ba bana liya

ab aarzu-e-duniya-o-'uqba nahin rahi

tu ne karam kiya mujhe apna bana liya

ka'be mein shaiKH tujh ko KHuda ki hai justuju

hum ne buton ke dar se KHuda ka pata liya

jo be-qarariyan thin wo taskin ban gain

jab dard-e-la-dawa ko masiha bana liya

wo aur honge maut jinhen kar gai 'fana'

main ne fana ki rah se dars-e-baqa liya