kafir-e-ishq ko kya se kya kar diya

kāfir-e-'ishq ko kyā se kyā kar diyā

but-parastī ne haq-āshnā kar diyā

koī dekhe haqīqat mire kufr kī

maiñ ne jis but ko puujā ḳhudā kar diyā

pārsā.ī dharī rah ga.ī shaiḳh kī

chashm-e-jādū asar tū ne kyā kar diyā

dekhne vaale kā'ba samajhne lage

kitnā raushan tirā naqsh-e-pā kar diyā

but-parastī meñ kī maiñ ne vo bandagī

but-kade ko bhī qibla-numā kar diyā

ai 'fanā' merī mayyat pe kahte haiñ vo

aap ne apnā vā'da vafā kar diyā

kafir-e-'ishq ko kya se kya kar diya

but-parasti ne haq-ashna kar diya

koi dekhe haqiqat mere kufr ki

main ne jis but ko puja KHuda kar diya

parsai dhari rah gai shaiKH ki

chashm-e-jadu asar tu ne kya kar diya

dekhne wale ka'ba samajhne lage

kitna raushan tera naqsh-e-pa kar diya

but-parasti mein ki main ne wo bandagi

but-kade ko bhi qibla-numa kar diya

ai 'fana' meri mayyat pe kahte hain wo

aap ne apna wa'da wafa kar diya