ishq taKHliq hua husn pe miT jaane ko

'ishq taḳhlīq huā husn pe miT jaane ko

sham' afsurda na ho phūñk ke parvāne ko

ġham-e-duniyā ġham-e-hastī ġham-e-ulfat ġham-e-dil

kitne 'unvān mile haiñ mire afsāne ko

phir se aa jā.egī dekho tan-e-be-jān meñ jaan

aap āvāz to diije zarā dīvāne ko

be-ḳhudī meñ bhī tirā naam liye jaatā hai

rog ye kaisā lagā hai tire mastāne ko

tujh se bas itnī talab hai tire dīvāne kī

apne jalvoñ se sajā de mire ġham-ḳhāne ko

sho.ala-e-dard-e-mohabbat koī bhaḌkā.e to

ham to tayyār haiñ us aag meñ jal jaane ko

gar mirā zauq-e-jabīñ-sā.ī salāmat hai 'fanā'

kā'ba ik roz banā dūñgā sanam-ḳhāne ko

'ishq taKHliq hua husn pe miT jaane ko

sham' afsurda na ho phunk ke parwane ko

gham-e-duniya gham-e-hasti gham-e-ulfat gham-e-dil

kitne 'unwan mile hain mere afsane ko

phir se aa jaegi dekho tan-e-be-jaan mein jaan

aap aawaz to dije zara diwane ko

be-KHudi mein bhi tera nam liye jata hai

rog ye kaisa laga hai tere mastane ko

tujh se bas itni talab hai tere diwane ki

apne jalwon se saja de mere gham-KHane ko

shoala-e-dard-e-mohabbat koi bhaDkae to

hum to tayyar hain us aag mein jal jaane ko

gar mera zauq-e-jabin-sai salamat hai 'fana'

ka'ba ek roz bana dunga sanam-KHane ko