kuchh thi to jazb-e-ishq mein ye thi KHushi meri

kuchh thī to jazb-e-'ishq meñ ye thī ḳhushī mirī

hotī tumhāre dar pe adā bandagī mirī

maiñ kyā karūñ ki 'azmat-e-ġham kā savāl thā

qurbān ho ga.ī tire ġham pe ḳhushī mirī

merā junūñ hai un kī tajallī kā ā.īna

pahuñchī hai kis maqām pe dīvāngī mirī

kunj-e-qafas meñ yād-e-nasheman hai aur maiñ

dekhe to aa ke koī zarā bekasī mirī

mere charāġh-e-’ishq se duniyā hai faiz-yāb

mere hī kaam na aa sakī raushnī mirī

masrūr huuñ ki hashr meñ uTThā sar-e-niyāz

maqbūl-e-bārgāh rahī bandagī mirī

maiñ huuñ 'fanā' qamar kī tajallī se faiz-yāb

duniyā meñ hai charāġh-e-adab shā'irī mirī

kuchh thi to jazb-e-'ishq mein ye thi KHushi meri

hoti tumhaare dar pe ada bandagi meri

main kya karun ki 'azmat-e-gham ka sawal tha

qurban ho gai tere gham pe KHushi meri

mera junun hai un ki tajalli ka aaina

pahunchi hai kis maqam pe diwangi meri

kunj-e-qafas mein yaad-e-nasheman hai aur main

dekhe to aa ke koi zara bekasi meri

mere charagh-e-’ishq se duniya hai faiz-yab

mere hi kaam na aa saki raushni meri

masrur hun ki hashr mein uTTha sar-e-niyaz

maqbul-e-bargah rahi bandagi meri

main hun 'fana' qamar ki tajalli se faiz-yab

duniya mein hai charagh-e-adab sha'iri meri