maal-e-soz-e-gham-ha-e-nihani dekhte jao

ma.āl-e-soz-e-ġham-hā-e-nihānī dekhte jaao

bhaḌak uThī hai sham'-e-zindagānī dekhte jaao

chale bhī aao vo hai qabr-e-'fānī' dekhte jaao

tum apne marne vaale kī nishānī dekhte jaao

abhī kyā hai kisī din ḳhuuñ rulā.egī ye ḳhāmoshī

zabān-e-hāl kī jādū-bayānī dekhte jaao

ġhurūr-e-husn kā sadqa koī jaatā hai duniyā se

kisī kī ḳhaak meñ miltī javānī dekhte jaao

udhar muñh pher kar kyā zab.h karte ho idhar dekho

mirī gardan pe ḳhanjar kī ravānī dekhte jaao

bahār-e-zindagānī kā lutf dekhā aur dekhoge

kisī kā 'aish marg-e-nā-gahānī dekhte jaao

sune jaate na the tum se mire din-rāt ke shikve

kafan sarkāo merī be-zabānī dekhte jaao

vo uThā shor-e-mātam āḳhirī dīdār-e-mayyat par

ab uThā chāhtī hai na.ash-e-'fānī' dekhte jaao

maal-e-soz-e-gham-ha-e-nihani dekhte jao

bhaDak uThi hai sham'-e-zindagani dekhte jao

chale bhi aao wo hai qabr-e-'fani' dekhte jao

tum apne marne wale ki nishani dekhte jao

abhi kya hai kisi din KHun rulaegi ye KHamoshi

zaban-e-haal ki jadu-bayani dekhte jao

ghurur-e-husn ka sadqa koi jata hai duniya se

kisi ki KHak mein milti jawani dekhte jao

udhar munh pher kar kya zabh karte ho idhar dekho

meri gardan pe KHanjar ki rawani dekhte jao

bahaar-e-zindagani ka lutf dekha aur dekhoge

kisi ka 'aish marg-e-na-gahani dekhte jao

sune jate na the tum se mere din-raat ke shikwe

kafan sarkao meri be-zabani dekhte jao

wo uTha shor-e-matam aaKHiri didar-e-mayyat par

ab uTha chahti hai nash-e-'fani' dekhte jao