faqirana aae sada kar chale

faqīrāna aa.e sadā kar chale

miyāñ ḳhush raho ham duā kar chale

jo tujh bin na jiine ko kahte the ham

so is ahd ko ab vafā kar chale

shifā apnī taqdīr hī meñ na thī

ki maqdūr tak to davā kar chale

vo kyā chiiz hai aah jis ke liye

har ik chiiz se dil uThā kar chale

bahut aarzū thī galī kī terī

so yaañ se lahū meñ nahā kar chale

dikhā.ī diye yuuñ ki be-ḳhud kiyā

hameñ aap se bhī judā kar chale

kaheñ kyā jo pūchhe koī ham se 'mīr'

jahāñ meñ tum aa.e the kyā kar chale

faqirana aae sada kar chale

miyan KHush raho hum dua kar chale

jo tujh bin na jine ko kahte the hum

so is ahd ko ab wafa kar chale

shifa apni taqdir hi mein na thi

ki maqdur tak to dawa kar chale

wo kya chiz hai aah jis ke liye

har ek chiz se dil uTha kar chale

bahut aarzu thi gali ki teri

so yan se lahu mein naha kar chale

dikhai diye yun ki be-KHud kiya

hamein aap se bhi juda kar chale

kahen kya jo puchhe koi hum se 'mir'

jahan mein tum aae the kya kar chale