جناں سے ہے دور اہل کینہ تمہارا

جناں سے ہے دور اہل کینہ تمہارا

نہ جائے گا دوزخ میں بینا تمہارا

نہ کیوں کر ہو معمور اسرار حق سے

ہے کنزِ الٰہی وہ سینا تمہارا

ہے بو گیسوئے پاک کی رشک عنبر

فزوں عطر سے ہے پسینا تمہارا

حسینانِ عالم کی دیکھیں ادائیں

نرالا ہے سب سے قرینا تمہارا

بزرگی میں رتبہ میں روئے زمیں پر

نہیں عرش سے کم مدینا تمہارا

مقامِ دنیٰ جب کہ وہ لامکاں ہے

نہ کیوں عرشِ اعظم ہو سینا تمہارا

نگاہِ کرم ہو دلِ بے بینوا پر

ہے محتاج نان شبینا تمہارا

اجل کے حوالے کرو جان فرحتؔ

کہ مرنے سے بدتر ہے جینا تمہارا