ghar jab bana liya tere dar par kahe baghair

ghar jab banā liyā tire dar par kahe baġhair

jānegā ab bhī tū na mirā ghar kahe baġhair

kahte haiñ jab rahī na mujhe tāqat-e-suḳhan

jānūñ kisī ke dil kī maiñ kyūñkar kahe baġhair

kaam us se aa paḌā hai ki jis kā jahān meñ

leve na koī naam sitam-gar kahe baġhair

jī meñ hī kuchh nahīñ hai hamāre vagarna ham

sar jaa.e yā rahe na raheñ par kahe baġhair

chhoḌūñgā maiñ na us but-e-kāfir kā pūjnā

chhoḌe na ḳhalq go mujhe kāfir kahe baġhair

maqsad hai nāz-o-ġhamza vale guftugū meñ kaam

chaltā nahīñ hai dashna-o-ḳhanjar kahe baġhair

har chand ho mushāhida-e-haq kī guftugū

bantī nahīñ hai bāda-o-sāġhar kahe baġhair

bahrā huuñ maiñ to chāhiye duunā ho iltifāt

suntā nahīñ huuñ baat mukarrar kahe baġhair

'ġhālib' na kar huzūr meñ tū baar baar 'arz

zāhir hai terā haal sab un par kahe baġhair

ghar jab bana liya tere dar par kahe baghair

jaanega ab bhi tu na mera ghar kahe baghair

kahte hain jab rahi na mujhe taqat-e-suKHan

jaanun kisi ke dil ki main kyunkar kahe baghair

kaam us se aa paDa hai ki jis ka jahan mein

lewe na koi nam sitam-gar kahe baghair

ji mein hi kuchh nahin hai hamare wagarna hum

sar jae ya rahe na rahen par kahe baghair

chhoDunga main na us but-e-kafir ka pujna

chhoDe na KHalq go mujhe kafir kahe baghair

maqsad hai naz-o-ghamza wale guftugu mein kaam

chalta nahin hai dashna-o-KHanjar kahe baghair

har chand ho mushahida-e-haq ki guftugu

banti nahin hai baada-o-saghar kahe baghair

bahra hun main to chahiye duna ho iltifat

sunta nahin hun baat mukarrar kahe baghair

'ghaalib' na kar huzur mein tu bar bar 'arz

zahir hai tera haal sab un par kahe baghair