kijiye lutf-o-karam ai jaan-e-man

kījiye lutf-o-karam ai jān-e-man

tā-ba-ke-jaur-o-sitam ai jān-e-man

bazm meñ ham aap kī phir aa ga.e

le ke ummīd-e-karam ai jān-e-man

aap to kar ke ta'alluq munqata.a

shaad haiñ nāshād ham ai jān-e-man

toḌ do tum ham na toḌeñge kabhī

ham ne khaa.ī hai qasam ai jān-e-man

kar lo iqrār-e-mohabbat phir zarā

haiñ bahut ġham-nāk ham ai jān-e-man

ham ne iqrār-e-mohabbat yuuñ kiyā

aap kā hogā karam ai jān-e-man

zindagī kā lutf phir aa jā.egā

ek ho jaa.eñ jo ham ai jān-e-man

ham pareshāñ-hāl haiñ barbād haiñ

kījiye kuchh to karam ai jān-e-man

aap kī aamad se ye vīrāñ kada

ban gayā bāġh-e-iram ai jān-e-man

chashm-e-mai-gūñ aap kī mad.hosh ham

kyā yahī hai jām-e-jam ai jān-e-man

phir khuleñge rāz-e-sar-basta tamām

jaan se guzre jo ham ai jān-e-man

jo bhī chāheñ dījiye ab faisla

hai sar-e-taslīm ḳham ai jān-e-man

sar ke bal jā kar gire us jā se ham

rah gayā jab ik qadam ai jān-e-man

dekh kar ye aañkh terī nīm-bāz

mast haiñ sarshār ham ai jān-e-man

ik na ik din aap ḳhud aa jā.eñge

toḌ kar apnī qasam ai jān-e-man

dekh leñ vo sāmne aatā hai kaun

sar jhukā.e sub.h-dam ai jān-e-man

jis qadar mumkin ho jald aa jā.iye

rah gayā hai vaqt kam ai jān-e-man

'ishq meñ aatā hai ik aisā maqām

jis jagah par ham na tum ai jān-e-man

tum kisī sūrat na mere ban sake

khā rahā hai ik ye ġham ai jān-e-man

sīdhe muñh tum baat bhī karte nahīñ

kyā ye khaa.ī hai qasam ai jān-e-man

kaun suntā hai sunā.eñ ham kise

apnī rūdād-e-alam ai jān-e-man

DhūñDhne se bhī nahīñ miltī ḳhabar

ho gayā huuñ aisā ġham ai jān-e-man

pūchhte ho mujh se ab kyā haal hai

pher kar nazar-e-karam ai jān-e-man

tum jahāñ chāho vahāñ chhupte phiro

DhūñDh leñge tujh ko ham ai jān-e-man

hai tamannā ab dil-e-'mushtāq' kī

zindagī guzre ba-ham ai jān-e-man

kijiye lutf-o-karam ai jaan-e-man

ta-ba-ke-jaur-o-sitam ai jaan-e-man

bazm mein hum aap ki phir aa gae

le ke ummid-e-karam ai jaan-e-man

aap to kar ke ta'alluq munqata

shad hain nashad hum ai jaan-e-man

toD do tum hum na toDenge kabhi

hum ne khai hai qasam ai jaan-e-man

kar lo iqrar-e-mohabbat phir zara

hain bahut gham-nak hum ai jaan-e-man

hum ne iqrar-e-mohabbat yun kiya

aap ka hoga karam ai jaan-e-man

zindagi ka lutf phir aa jaega

ek ho jaen jo hum ai jaan-e-man

hum pareshan-haal hain barbaad hain

kijiye kuchh to karam ai jaan-e-man

aap ki aamad se ye viran kada

ban gaya bagh-e-iram ai jaan-e-man

chashm-e-mai-gun aap ki madhosh hum

kya yahi hai jam-e-jam ai jaan-e-man

phir khulenge raaz-e-sar-basta tamam

jaan se guzre jo hum ai jaan-e-man

jo bhi chahen dijiye ab faisla

hai sar-e-taslim KHam ai jaan-e-man

sar ke bal ja kar gire us ja se hum

rah gaya jab ek qadam ai jaan-e-man

dekh kar ye aankh teri nim-baz

mast hain sarshaar hum ai jaan-e-man

ek na ek din aap KHud aa jaenge

toD kar apni qasam ai jaan-e-man

dekh len wo samne aata hai kaun

sar jhukae subh-dam ai jaan-e-man

jis qadar mumkin ho jald aa jaiye

rah gaya hai waqt kam ai jaan-e-man

'ishq mein aata hai ek aisa maqam

jis jagah par hum na tum ai jaan-e-man

tum kisi surat na mere ban sake

kha raha hai ek ye gham ai jaan-e-man

sidhe munh tum baat bhi karte nahin

kya ye khai hai qasam ai jaan-e-man

kaun sunta hai sunaen hum kise

apni rudad-e-alam ai jaan-e-man

DhunDhne se bhi nahin milti KHabar

ho gaya hun aisa gham ai jaan-e-man

puchhte ho mujh se ab kya haal hai

pher kar nazar-e-karam ai jaan-e-man

tum jahan chaho wahan chhupte phiro

DhunDh lenge tujh ko hum ai jaan-e-man

hai tamanna ab dil-e-'mushtaq' ki

zindagi guzre ba-ham ai jaan-e-man