jis ke phande mein phansa hai dil hamara aaj-kal

jis ke phañde meñ phañsā hai dil hamārā āj-kal

vo nazar aatā nahīñ sayyād pyārā āj-kal

kyā batā.ūñ us dil-e-betāb kī be-tābiyāñ

kar liyā hai us sitamgar ne kināra āj-kal

is adā se us ne dikhlā.ī mujhe apnī jhalak

ho gayā jaan se bhī vo pyārā āj-kal

ā.īna us but kī sūrat kā banā kar sāmne

kar rahā huuñ qudrat-e-haq kā nazāra āj-kal

ab sañvāro yā bigāḌo baat itnī jaan lo

hai tumhāre haath meñ bechāre kā chāra āj-kal

allāh-allāh us dil-e-majbūr kī majbūriyāñ

kar rahā hai jo na karnā thā gavāra āj-kal

dasht-e-ġhurbat meñ akelā chhoḌ kar vo chal diye

phir rahā huuñ mārā-mārā be-sahārā āj-kal

ye nahīñ mā'lūm tū merā huā hai yā nahīñ

jān-o-dil se ho chukā huuñ maiñ tumhārā āj-kal

ab to apnā lījiye hazrat dil-e-'mushtāq' ko

khā rahā hai Thokareñ qismat kā maarā āj-kal

jis ke phande mein phansa hai dil hamara aaj-kal

wo nazar aata nahin sayyaad pyara aaj-kal

kya bataun us dil-e-betab ki be-tabiyan

kar liya hai us sitamgar ne kinara aaj-kal

is ada se us ne dikhlai mujhe apni jhalak

ho gaya jaan se bhi wo pyara aaj-kal

aaina us but ki surat ka bana kar samne

kar raha hun qudrat-e-haq ka nazara aaj-kal

ab sanwaro ya bigaDo baat itni jaan lo

hai tumhaare hath mein bechaare ka chaara aaj-kal

allah-allah us dil-e-majbur ki majburiyan

kar raha hai jo na karna tha gawara aaj-kal

dasht-e-ghurbat mein akela chhoD kar wo chal diye

phir raha hun mara-mara be-sahaara aaj-kal

ye nahin ma'lum tu mera hua hai ya nahin

jaan-o-dil se ho chuka hun main tumhaara aaj-kal

ab to apna lijiye hazrat dil-e-'mushtaq' ko

kha raha hai Thokaren qismat ka mara aaj-kal