جس کے پھندے میں پھنسا ہے دل ہمارا آج کل

جس کے پھندے میں پھنسا ہے دل ہمارا آج کل

وہ نظر آتا نہیں صیاد پیارا آج کل

کیا بتاؤں اس دلِ بیتاب کی بیتابیاں

کر لیا ہے اس ستم گر نے کنارہ آج کل

اس ادا سے اس نے دکھلائی مجھے اپنی جھلک

ہو گیا جان سے بھی وہ پیارا آج کل

آئینہ اس بت کی صورت کا بنا کر سامنے

کر رہا ہوں قدرتِ حق کا نظارہ آج کل

اب سنوارو یا بگاڑو بات اتنی جان لو

ہے تمہارے ہاتھ میں بیچارے کا چارہ آج کل

اللہ اللہ اس دل مجبور کی مجبوریاں

کر رہا ہے جو نہ کرنا تھا گوارہ آج کل

دشتِ غربت میں اکیلا چھوڑ کر وہ چل دئیے

پھر رہا ہوں مارا مارا بے سہارا آج کل

یہ نہیں معلوم تو میرا ہوا ہے یا نہیں

جان و دل سے ہو چکا ہوں میں تمہارا آج کل

اب تو اپنا لیجیے حضرت دلِ مشتاقؔ کو

کھا رہا ہے ٹھوکریں قسمت کا مارا آج کل