hai bas-ki har ek un ke ishaare mein nishan aur

hai bas-ki har ik un ke ishāre meñ nishāñ aur

karte haiñ mohabbat to guzartā hai gumāñ aur

yā-rab vo na samjhe haiñ na samjheñge mirī baat

de aur dil un ko jo na de mujh ko zabāñ aur

abrū se hai kyā us nigah-e-nāz ko paivand

hai tiir muqarrar magar is kī hai kamāñ aur

tum shahr meñ ho to hameñ kyā ġham jab uTheñge

le ā.eñge bāzār se jā kar dil-o-jāñ aur

har chand subuk-dast hue but-shikanī meñ

ham haiñ to abhī raah meñ hai sañg-e-girāñ aur

hai ḳhūn-e-jigar josh meñ dil khol ke rotā

hote jo ka.ī dīda-e-ḳhūñ-nāba-fishāñ aur

martā huuñ is āvāz pe har chand sar uḌ jaa.e

jallād ko lekin vo kahe jaa.eñ ki haañ aur

logoñ ko hai ḳhurshīd-e-jahāñ-tāb kā dhokā

har roz dikhātā huuñ maiñ ik dāġh-e-nihāñ aur

letā na agar dil tumheñ detā koī dam chain

kartā jo na martā koī din āh-o-fuġhāñ aur

paate nahīñ jab raah to chaḌh jaate haiñ naale

ruktī hai mirī tab.a to hotī hai ravāñ aur

haiñ aur bhī duniyā meñ suḳhan-var bahut achchhe

kahte haiñ ki 'ġhālib' kā hai andāz-e-bayāñ aur

hai bas-ki har ek un ke ishaare mein nishan aur

karte hain mohabbat to guzarta hai guman aur

ya-rab wo na samjhe hain na samjhenge meri baat

de aur dil un ko jo na de mujh ko zaban aur

abru se hai kya us nigah-e-naz ko paiwand

hai tir muqarrar magar is ki hai kaman aur

tum shahr mein ho to hamein kya gham jab uThenge

le aaenge bazar se ja kar dil-o-jaan aur

har chand subuk-dast hue but-shikani mein

hum hain to abhi rah mein hai sang-e-giran aur

hai KHun-e-jigar josh mein dil khol ke rota

hote jo kai dida-e-KHun-naba-fishan aur

marta hun is aawaz pe har chand sar uD jae

jallad ko lekin wo kahe jaen ki han aur

logon ko hai KHurshid-e-jahan-tab ka dhoka

har roz dikhata hun main ek dagh-e-nihan aur

leta na agar dil tumhein deta koi dam chain

karta jo na marta koi din aah-o-fughan aur

pate nahin jab rah to chaDh jate hain nale

rukti hai meri taba to hoti hai rawan aur

hain aur bhi duniya mein suKHan-war bahut achchhe

kahte hain ki 'ghaalib' ka hai andaz-e-bayan aur