hai dua yaad magar harf-e-dua yaad nahin

hai du'ā yaad magar harf-e-du'ā yaad nahīñ

mere naġhmāt ko andāz-e-navā yaad nahīñ

maiñ ne palkoñ se dar-e-yār pe dastak dī hai

maiñ vo saa.il huuñ jise koī sadā yaad nahīñ

ham ne jinke liye rāhoñ meñ bichhāyā thā lahū

ham se kahte haiñ vahī 'ahd-e-vafā yaad nahīñ

kaise bhar aa.eñ sar-e-shām kisī kī āñkheñ

kaise tharrā.ī charāġhoñ kī ziyā yaad nahīñ

sirf dhundlā.e sitāroñ kī chamak dekhī hai

kab huā kaun huā kis se ḳhafā yaad nahīñ

zindagī jabr-e-musalsal kī tarah kaaTī hai

jaane kis jurm kī paa.ī hai sazā yaad nahīñ

aao ik sajda kareñ ’ālam-e-mad.hoshī meñ

log kahte haiñ ki 'sāġhar' ko ḳhudā yaad nahīñ

hai du'a yaad magar harf-e-du'a yaad nahin

mere naghmat ko andaz-e-nawa yaad nahin

main ne palkon se dar-e-yar pe dastak di hai

main wo sail hun jise koi sada yaad nahin

hum ne jinke liye rahon mein bichhaya tha lahu

hum se kahte hain wahi 'ahd-e-wafa yaad nahin

kaise bhar aaen sar-e-sham kisi ki aankhen

kaise tharrai charaghon ki ziya yaad nahin

sirf dhundlae sitaron ki chamak dekhi hai

kab hua kaun hua kis se KHafa yaad nahin

zindagi jabr-e-musalsal ki tarah kaTi hai

jaane kis jurm ki pai hai saza yaad nahin

aao ek sajda karen ’alam-e-madhoshi mein

log kahte hain ki 'saghar' ko KHuda yaad nahin