hairan hun dil ko roun ki piTun jigar ko main

hairāñ huuñ dil ko ro.uuñ ki pīTūñ jigar ko maiñ

maqdūr ho to saath rakhūñ nauhagar ko maiñ

chhoḌā na rashk ne ki tire ghar kā naam luuñ

har ik se pūchhtā huuñ ki jā.ūñ kidhar ko maiñ

jaanā paḌā raqīb ke dar par hazār baar

ai kaash jāntā na tire rah-guzar ko maiñ

hai kyā jo kas ke bāñdhiye merī balā Dare

kyā jāntā nahīñ huuñ tumhārī kamar ko maiñ

lo vo bhī kahte haiñ ki ye be-nañg-o-nām hai

ye jāntā agar to luTātā na ghar ko maiñ

chaltā huuñ thoḌī duur har ik tez-rau ke saath

pahchāntā nahīñ huuñ abhī rāhbar ko maiñ

ḳhvāhish ko ahmaqoñ ne parastish diyā qarār

kyā pūjtā huuñ us but-e-bedād-gar ko maiñ

phir be-ḳhudī meñ bhuul gayā rāh-e-kū-e-yār

jaatā vagarna ek din apnī ḳhabar ko maiñ

apne pe kar rahā huuñ qayās ahl-e-dahr kā

samjhā huuñ dil-pazīr mata’-e-hunar ko maiñ

'ġhālib' ḳhudā kare ki savār-e-samand-e-nāz

dekhūñ 'alī bahādur-e-’ālī-guhar ko maiñ

hairan hun dil ko roun ki piTun jigar ko main

maqdur ho to sath rakhun nauhagar ko main

chhoDa na rashk ne ki tere ghar ka nam lun

har ek se puchhta hun ki jaun kidhar ko main

jaana paDa raqib ke dar par hazar bar

ai kash jaanta na tere rah-guzar ko main

hai kya jo kas ke bandhiye meri bala Dare

kya jaanta nahin hun tumhaari kamar ko main

lo wo bhi kahte hain ki ye be-nang-o-nam hai

ye jaanta agar to luTata na ghar ko main

chalta hun thoDi dur har ek tez-rau ke sath

pahchanta nahin hun abhi rahbar ko main

KHwahish ko ahmaqon ne parastish diya qarar

kya pujta hun us but-e-bedad-gar ko main

phir be-KHudi mein bhul gaya rah-e-ku-e-yar

jata wagarna ek din apni KHabar ko main

apne pe kar raha hun qayas ahl-e-dahr ka

samjha hun dil-pazir mata’-e-hunar ko main

'ghaalib' KHuda kare ki sawar-e-samand-e-naz

dekhun 'ali bahadur-e-’ali-guhar ko main