humne un ke samne awwal to KHanjar rakh diya

ham ne un ke sāmne avval to ḳhanjar rakh diyā

phir kaleja rakh diyā dil rakh diyā sar rakh diyā

qatra-e-ḳhūn-e-jigar se kī tavāzo.a 'ishq kī

sāmne mehmāñ ke jo thā mayassar rakh diyā

munsifī ho to ġhazab nā-munsifī ho to sitam

us ne merā faisla mauqūf mujh par rakh diyā

kahte haiñ bū-e-vafā aatī hai un phūloñ meñ aaj

dil jo ham ne lāla-o-gul meñ milā kar rakh diyā

kal chhuḌā leñge ye zāhid aaj to saaqī ke haath

rehn ik chullū pe ham ne hauz-e-kausar rakh diyā

zulf ḳhālī haath ḳhālī kis jagah DhūñDūñ use

tum ne dil le kar kahāñ ai banda-parvar rakh diyā

shauq bhī hai vahm bhī hai kyā karūñ ai nāma-bar

kal jo likhā kaaT kar vo aaj daftar rakh diyā

'dāġh' kī shāmat jo aa.ī iztirāb-e-shauq meñ

hāl-e-dil kambaḳht ne sab un ke muñh par rakh diyā

hum ne un ke samne awwal to KHanjar rakh diya

phir kaleja rakh diya dil rakh diya sar rakh diya

qatra-e-KHun-e-jigar se ki tawazoa 'ishq ki

samne mehman ke jo tha mayassar rakh diya

munsifi ho to ghazab na-munsifi ho to sitam

us ne mera faisla mauquf mujh par rakh diya

kahte hain bu-e-wafa aati hai un phulon mein aaj

dil jo hum ne lala-o-gul mein mila kar rakh diya

kal chhuDa lenge ye zahid aaj to saqi ke hath

rehn ek chullu pe hum ne hauz-e-kausar rakh diya

zulf KHali hath KHali kis jagah DhunDun use

tum ne dil le kar kahan ai banda-parwar rakh diya

shauq bhi hai wahm bhi hai kya karun ai nama-bar

kal jo likha kaT kar wo aaj daftar rakh diya

'dagh' ki shamat jo aai iztirab-e-shauq mein

haal-e-dil kambaKHt ne sab un ke munh par rakh diya