hum tujhse kis hawas kī falak justujū kareñ

ham tujh se kis havas kī falak justujū kareñ

dil hī nahīñ rahā hai ki kuchh aarzū kareñ

miT jaa.eñ ek aan meñ kasrat-numā.iyāñ

ham aa.ine ke sāmne jab aa ke hū kareñ

tar-dāmanī pe shaiḳh hamārī na jā.iyo

dāman nichoḌ deñ to farishte vuzū kareñ

sar-tā-qadam zabān haiñ juuñ sham.a go ki ham

par ye kahāñ majāl jo kuchh guftugū kareñ

har-chand aa.ina huuñ par itnā huuñ nā-qubūl

muñh pher le vo jis ke mujhe rū-ba-rū kareñ

ne gul ko hai sabāt na ham ko hai e'tibār

kis baat par chaman havas-e-rañg-o-bū kareñ

hai apnī ye salāh ki sab zāhidān-e-shahr

ai 'dard' aa ke bai.at-e-dast-e-subū kareñ

hum tujh se kis hawas kī falak justujū kareñ

dil hī nahīñ rahā hai ki kuchh aarzū kareñ

miT jaeñ ek aan meñ kasrat-numāiyāñ

hum aaine ke sāmne jab aa ke hū kareñ

tar-dāmanī pe shaiḳh hamārī na jāiyo

dāman nichoḌ deñ to farishte wuzū kareñ

sar-tā-qadam zabān haiñ juñ shama go ki hum

par ye kahāñ majāl jo kuchh guftugū kareñ

har-chand aaina huñ par itnā huñ nā-qubūl

muñh pher le wo jis ke mujhe rū-ba-rū kareñ

ne gul ko hai sabāt na hum ko hai e'tibār

kis baat par chaman hawas-e-rañg-o-bū kareñ

hai apnī ye salāh ki sab zāhidān-e-shahr

ai 'dard' aa ke baiat-e-dast-e-subū kareñ