haqiqat aur hi kuchh hai magar hum kya samajhte hain

haqīqat aur hī kuchh hai magar ham kyā samajhte haiñ

jo apnā ho nahīñ saktā use apnā samajhte haiñ

ye dars-e-avvalīñ mujh ko milā mere buzurgoñ se

bahut chhoTe haiñ vo auroñ ko jo chhoTā samajhte haiñ

na jaane kyuuñ hamārī un kī ik pal bhī nahīñ bantī

jo apnā qibla-e-dil daulat-e-duniyā samajhte haiñ

kHudā-o-mustafā.ī se haT ke vo haiñ saḳht dhoke meñ

jo apnī zaat ko tanqīd se baalā samajhte haiñ

bure achchhoñ ko bhī achchhā nahīñ gardānte lekin

jo achchhe haiñ bure logoñ ko bhī achchhā samajhte haiñ

na pūchho kuchh ki kyā de diyā hai dene vaale ne

baḌā ho laakh koī ham kisī ko kyā samajhte haiñ

ba-zāhir ḳhush the jo kal tak hamārī gul-fishānī par

vo apne bhī hameñ ab raah kā kāñTā samajhte haiñ

qiyāmat sar pe jo TuuTe musībat dil pe jo aa.e

haqīqat meñ use ham marzī-e-maulā samajhte haiñ

lagā dī tohmat-e-bāda-kashī un par bhī vā'iz ne

'nasīr' un kī nazar ko jo mai-o-mīnā samajhte haiñ

haqiqat aur hi kuchh hai magar hum kya samajhte hain

jo apna ho nahin sakta use apna samajhte hain

ye dars-e-awwalin mujh ko mila mere buzurgon se

bahut chhoTe hain wo auron ko jo chhoTa samajhte hain

na jaane kyun hamari un ki ek pal bhi nahin banti

jo apna qibla-e-dil daulat-e-duniya samajhte hain

kHuda-o-mustafai se haT ke wo hain saKHt dhoke mein

jo apni zat ko tanqid se baala samajhte hain

bure achchhon ko bhi achchha nahin gardante lekin

jo achchhe hain bure logon ko bhi achchha samajhte hain

na puchho kuchh ki kya de diya hai dene wale ne

baDa ho lakh koi hum kisi ko kya samajhte hain

ba-zahir KHush the jo kal tak hamari gul-fishani par

wo apne bhi hamein ab rah ka kanTa samajhte hain

qiyamat sar pe jo TuTe musibat dil pe jo aae

haqiqat mein use hum marzi-e-maula samajhte hain

laga di tohmat-e-baada-kashi un par bhi wa'iz ne

'nasir' un ki nazar ko jo mai-o-mina samajhte hain