har ek baat pe kahte ho tum ki tu kya hai

har ek baat pe kahte ho tum ki tū kyā hai

tumhīñ kaho ki ye andāz-e-guftugū kyā hai

na sho'le meñ ye karishma na barq meñ ye adā

koī batāo ki vo shoḳh-e-tund-ḳhū kyā hai

ye rashk hai ki vo hotā hai ham-suḳhan tum se

vagarna ḳhauf-e-bad-āmozi-e-’adū kyā hai

chipak rahā hai badan par lahū se pairāhan

hamāre jaib ko ab hājat-e-rafū kyā hai

jalā hai jism jahāñ dil bhī jal gayā hogā

kuredte ho jo ab raakh justujū kyā hai

ragoñ meñ dauḌte phirne ke ham nahīñ qaa.il

jab aañkh hī se na Tapkā to phir lahū kyā hai

vo chiiz jis ke liye ham ko ho bahisht 'azīz

sivā.e bāda-e-gulfām-e-mushk-bū kyā hai

piyūñ sharāb agar ḳhum bhī dekh luuñ do-chār

ye shīsha-o-qadah-o-kūza-o-subū kyā hai

rahī na tāqat-e-guftār aur agar ho bhī

to kis umiid pe kahiye ki aarzū kyā hai

huā hai shah kā musāhib phire hai itrātā

vagarna shahr meñ 'ġhālib' kī aabrū kyā hai

har ek baat pe kahte ho tum ki tu kya hai

tumhin kaho ki ye andaz-e-guftugu kya hai

na sho'le mein ye karishma na barq mein ye ada

koi batao ki wo shoKH-e-tund-KHu kya hai

ye rashk hai ki wo hota hai ham-suKHan tum se

wagarna KHauf-e-bad-amozi-e-’adu kya hai

chipak raha hai badan par lahu se pairahan

hamare jaib ko ab hajat-e-rafu kya hai

jala hai jism jahan dil bhi jal gaya hoga

kuredte ho jo ab rakh justuju kya hai

ragon mein dauDte phirne ke hum nahin qail

jab aankh hi se na Tapka to phir lahu kya hai

wo chiz jis ke liye hum ko ho bahisht 'aziz

siwae baada-e-gulfam-e-mushk-bu kya hai

piyun sharab agar KHum bhi dekh lun do-chaar

ye shisha-o-qadah-o-kuza-o-subu kya hai

rahi na taqat-e-guftar aur agar ho bhi

to kis umid pe kahiye ki aarzu kya hai

hua hai shah ka musahib phire hai itraata

wagarna shahr mein 'ghaalib' ki aabru kya hai