huī tāḳhīr to kuchh bāis-e-tāḳhīr bhī thā

huī tāḳhīr to kuchh bā.is-e-tāḳhīr bhī thā

aap aate the magar koī ināñ-gīr bhī thā

tum se bejā hai mujhe apnī tabāhī kā gila

us meñ kuchh shā.iba-e-ḳhūbi-e-taqdīr bhī thā

tū mujhe bhuul gayā ho to patā batlā duuñ

kabhī fitrāk meñ tere koī naḳhchīr bhī thā

qaid meñ hai tire vahshī ko vahī zulf kī yaad

haañ kuchh ik ranj-e-girāñ-bāri-e-zanjīr bhī thā

bijlī ik kauñd ga.ī āñkhoñ ke aage to kyā

baat karte ki maiñ lab-tishna-e-taqrīr bhī thā

yūsuf us ko kahūñ aur kuchh na kahe ḳhair huī

gar bigaḌ baiThe to maiñ lā.iq-e-tāzīr bhī thā

dekh kar ġhair ko ho kyuuñ na kalejā ThanDā

naala kartā thā vale tālib-e-tāsīr bhī thā

peshe meñ aib nahīñ rakhiye na farhād ko naam

ham hī āshufta-saroñ meñ vo javāñ-mīr bhī thā

ham the marne ko khaḌe paas na aayā na sahī

āḳhir us shoḳh ke tarkash meñ koī tiir bhī thā

pakḌe jaate haiñ farishtoñ ke likhe par nā-haq

aadmī koī hamārā dam-e-tahrīr bhī thā

reḳhte ke tumhīñ ustād nahīñ ho 'ġhālib'

kahte haiñ agle zamāne meñ koī 'mīr' bhī thā

huī tāḳhīr to kuchh bāis-e-tāḳhīr bhī thā

aap aate the magar koī ināñ-gīr bhī thā

tum se bejā hai mujhe apnī tabāhī kā gila

us meñ kuchh shāiba-e-ḳhūbi-e-taqdīr bhī thā

tū mujhe bhul gayā ho to patā batlā duñ

kabhī fitrāk meñ tere koī naḳhchīr bhī thā

qaid meñ hai tere wahshī ko wahī zulf kī yaad

hañ kuchh ek ranj-e-girāñ-bāri-e-zanjīr bhī thā

bijlī ek kauñd gaī āñkhoñ ke aage to kyā

baat karte ki maiñ lab-tishna-e-taqrīr bhī thā

yūsuf us ko kahūñ aur kuchh na kahe ḳhair huī

gar bigaḌ baiThe to maiñ lāiq-e-tāzīr bhī thā

dekh kar ġhair ko ho kyuñ na kalejā ThanDā

nala kartā thā wale tālib-e-tāsīr bhī thā

peshe meñ aib nahīñ rakhiye na farhād ko nam

hum hī āshufta-saroñ meñ wo jawāñ-mīr bhī thā

hum the marne ko khaḌe pas na aayā na sahī

āḳhir us shoḳh ke tarkash meñ koī tir bhī thā

pakḌe jate haiñ farishtoñ ke likhe par nā-haq

aadmī koī hamārā dam-e-tahrīr bhī thā

reḳhte ke tumhīñ ustād nahīñ ho 'ġhālib'

kahte haiñ agle zamāne meñ koī 'mīr' bhī thā