hum par jafa se tark-e-wafa ka guman nahin

ham par jafā se tark-e-vafā kā gumāñ nahīñ

ik chheḌ hai vagarna murād imtihāñ nahīñ

kis muñh se shukr kījiye is lutf-e-ḳhās kā

pursish hai aur pā-e-suḳhan darmiyāñ nahīñ

ham ko sitam 'azīz sitamgar ko ham 'azīz

nā-mehrbāñ nahīñ hai agar mehrbāñ nahīñ

bosa nahīñ na dījiye dushnām hī sahī

āḳhir zabāñ to rakhte ho tum gar dahāñ nahīñ

har-chand jāñ-gudāzi-e-qahr-o-’itāb hai

har-chand pusht-e-garmī-e-tāb-o-tavāñ nahīñ

jaañ mutrib-e-tarāna-e-hal-mim-mazīd hai

lab parda-sañj-e-zamzama-e-al-amāñ nahīñ

ḳhanjar se chiir siina agar dil na ho do-nīm

dil meñ chhurī chubho mizha gar ḳhūñ-chakāñ nahīñ

hai nañg-e-sīnā dil agar ātish-kada na ho

hai ’ār-e-dil nafas agar āzar-fishāñ nahīñ

nuqsāñ nahīñ junūñ meñ balā se ho ghar ḳharāb

sau gaz zamīñ ke badle bayābāñ girāñ nahīñ

kahte ho kyā likhā hai tirī sarnavisht meñ

goyā jabīñ pe sajda-e-but kā nahīñ

paatā huuñ us se daad kuchh apne kalām kī

rūhul-qudus agarche mirā ham-zabāñ nahīñ

jaañ hai bahā-e-bosa vale kyuuñ kahe abhī

'ġhālib' ko jāntā hai ki vo nīm-jāñ nahīñ

jis jā ki pā-e-sail-e-balā darmiyāñ nahīñ

dīvānagāñ ko vaañ havas-e-ḳhānmāñ nahīñ

gul ġhunchagī meñ ġharqa-e-dariyā-e-rañg hai

ai āgahī fareb-e-tamāshā kahāñ nahīñ

kis jurm se hai chashm tujhe hasrat qubūl

barg-e-hinā magar mizha-e-ḳhūñ-fishāñ nahīñ

har rañg-e-gardish aa.ina ījād-e-dard hai

ashk-e-sahāb juz ba-vidā’-e-ḳhizāñ nahīñ

juz 'ijz kyā karūñ ba-tamannā-e-be-ḳhudī

tāqat harīf-e-saḳhtī-e-ḳhvāb-e-girāñ nahīñ

'ibrat se pūchh dard-e-pareshānī-e-nigāh

ye gard-e-vahm juz basar-e-imtihāñ nahīñ

barq-e-ba-jān-e-hausla ātish-fagan 'asad'

ai dil-fasurda tāqat-e-zabt-e-fuġhāñ nahīñ

hum par jafa se tark-e-wafa ka guman nahin

ek chheD hai wagarna murad imtihan nahin

kis munh se shukr kijiye is lutf-e-KHas ka

pursish hai aur pa-e-suKHan darmiyan nahin

hum ko sitam 'aziz sitamgar ko hum 'aziz

na-mehrban nahin hai agar mehrban nahin

bosa nahin na dijiye dushnam hi sahi

aaKHir zaban to rakhte ho tum gar dahan nahin

har-chand jaan-gudazi-e-qahr-o-’itab hai

har-chand pusht-e-garmi-e-tab-o-tawan nahin

jaan mutrib-e-tarana-e-hal-mim-mazid hai

lab parda-sanj-e-zamzama-e-al-aman nahin

KHanjar se chir sina agar dil na ho do-nim

dil mein chhuri chubho mizha gar KHun-chakan nahin

hai nang-e-sina dil agar aatish-kada na ho

hai ’ar-e-dil nafas agar aazar-fishan nahin

nuqsan nahin junun mein bala se ho ghar KHarab

sau gaz zamin ke badle bayaban giran nahin

kahte ho kya likha hai teri sarnawisht mein

goya jabin pe sajda-e-but ka nahin

pata hun us se dad kuchh apne kalam ki

ruhul-qudus agarche mera ham-zaban nahin

jaan hai baha-e-bosa wale kyun kahe abhi

'ghaalib' ko jaanta hai ki wo nim-jaan nahin

jis ja ki pa-e-sail-e-bala darmiyan nahin

diwanagan ko wan hawas-e-KHanman nahin

gul ghunchagi mein gharqa-e-dariya-e-rang hai

ai aagahi fareb-e-tamasha kahan nahin

kis jurm se hai chashm tujhe hasrat qubul

barg-e-hina magar mizha-e-KHun-fishan nahin

har rang-e-gardish aaina ijad-e-dard hai

ashk-e-sahab juz ba-wida’-e-KHizan nahin

juz 'ijz kya karun ba-tamanna-e-be-KHudi

taqat harif-e-saKHti-e-KHwab-e-giran nahin

'ibrat se puchh dard-e-pareshani-e-nigah

ye gard-e-wahm juz basar-e-imtihan nahin

barq-e-ba-jaan-e-hausla aatish-fagan 'asad'

ai dil-fasurda taqat-e-zabt-e-fughan nahin