husn-e-butan ka ishq meri jaan ho gaya

husn-e-butāñ kā 'ishq mirī jaan ho gayā

ye kufr ab to hāsil-e-īmān ho gayā

ai zabt-e-dil ye kaisī qayāmat guzar ga.ī

dīvāngī meñ chaak garebān ho gayā

vo ban sañvar ke phir mirī mahfil meñ aa ga.e

baiThe-biThā.e hashr kā sāmān ho gayā

kar ke siñghār aa.e vo aisī adā ke saath

ā.īna un ko dekh ke hairān ho gayā

dekhā jo us sanam ko to mahsūs ye huā

jalva ḳhudā kā sūrat-e-insān ho gayā

sab merā 'ishq dekh ke lete haiñ terā naam

maiñ bhī tire jamāl kī pahchān ho gayā

puujā kareñge us kī 'fanā' ham tamām 'umr

vo but hamāre vāste bhagvān ho gayā

husn-e-butan ka 'ishq meri jaan ho gaya

ye kufr ab to hasil-e-iman ho gaya

ai zabt-e-dil ye kaisi qayamat guzar gai

diwangi mein chaak gareban ho gaya

wo ban sanwar ke phir meri mahfil mein aa gae

baiThe-biThae hashr ka saman ho gaya

kar ke singhaar aae wo aisi ada ke sath

aaina un ko dekh ke hairan ho gaya

dekha jo us sanam ko to mahsus ye hua

jalwa KHuda ka surat-e-insan ho gaya

sab mera 'ishq dekh ke lete hain tera nam

main bhi tere jamal ki pahchan ho gaya

puja karenge us ki 'fana' hum tamam 'umr

wo but hamare waste bhagwan ho gaya